Surxondaryo viloyatining Muzrabot va Uzun tumanlarida kredit mablag‘larini o‘zlashtirish holatlari fosh etildi, deb xabar beradi Bosh prokuratura huzuridagi departament.
Ma’lum qilinishicha, departamentning Muzrabot tuman bo‘limi tomonidan tergovga qadar tekshiruv o‘tkazilgan. Tekshiruv davomida “A.D.” MCHJ rahbari T.F. va boshqalar hududiy tijorat banki filialidan ajratilgan 400 million so‘m kredit garov taʼminotiga fuqaro X.X.ga tegishli binoni 520 million so‘mga baholab taqdim etib, keyinchalik bank filialining soxta xatiga asosan ushbu binoni taqiqdan chiqarishga erishib, kredit mablag‘ini o‘zlashtirish yo‘li bilan talon-toroj qilgani aniqlangan.
Shu kabi, departamentning Uzun tuman bo‘limi tomonidan o‘tkazilgan tergovga qadar tekshiruvda “J.L.” xususiy korxonasi rahbari Sh.A. va boshqalar 7 nafar fuqaro nomiga soxta hujjatlar orqali 211,8 million so‘m imtiyozli kredit rasmiylashtirib, ushbu mablag‘larni o‘zlashtirish yo‘li bilan talon-toroj qilgani ma’lum bo‘ldi.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Buxoroda fermer xo‘jaligi soxta hujjatlar orqali 420 ming dollardan ortiq kredit mablag‘ini o‘zlashtirib yuborgani aniqlangani to‘g‘risida xabar berilgandi. Shuningdek, Surxondaryo viloyatining Oltinsoy va Termiz tumanlarida 11 milliard so‘mdan ortiq kredit mablag‘larini o‘zlashtirgan MCHJ rahbarlari aniqlangandi. Surxondaryo va Farg‘onada esa oilaviy korxona rahbarlari 1,2 milliard so‘mdan ortiq imtiyozli kreditlarni talon-toroj qilgandi.
Izoh (0)