Amerikalik kimyogar professor Mishel Frankl choyning mukammal ta’mi uchun bir chimdim tuz qo‘shish kerakligini ma’lum qildi. Bu AQSH va Buyuk Britaniyada diplomatik mojaroni keltirib chiqardi.
Professor o‘zining yangi nashrdan chiqqan “Qaynatilgan: choy kimyosi” kitobida ichimlik tayyorlash jarayoniga ilmiy nuqtai nazardan yondashgan. Frankl so‘nggi ming yillikda sinab ko‘rilgan choy tayyorlashning bir necha yuzlab usullari tahlili natijalarini taqdim etadi. Bunda asosiy urg‘u uch narsaga: choyga biroz tuz qo‘shish, issiq sut solish va paketli choyni botirib, botirib siqib qo‘yishga qaratilgan.
Uning tavsiyalari quyidagicha: choyli paketni uzoq vaqt qaynatib bo‘lmaydi, uni bir necha marta suvga botirib, siqib qo‘yish kerak. Bu achchiqlikni yumshatadi. Choy paketi qanchalik katta bo‘lsa, shuncha yaxshi, sababi ichidagi barglar qaynoq suv bilan aloqada bo‘lib, erkinroq harakatlanadi. Frankl bargli choy, albatta, paketli choydan yaxshiroq ekanini ta’kidlaydi.
Krujkaning ichi keng, baland bo‘lmasligi va harorati iliq bo‘lishi kerak. Ichimlik yuzasidagi plyonkani olib tashlash uchun choyga bir chimdim tuz qo‘shish kerak, sababi natriy ionlari achchiqlikni “olib tashlaydi”. Nihoyat, sutni choyga quyish kerak, aksincha emas.
Bunday maslahat inglizlarning noroziligiga sabab bo‘ldi, ular choyni o‘zlarining milliy ichimligi deb hisoblaydilar. Daily Mail maqolasi ostidagi izohlarda, britanlar “amerikaliklarga choy tayyorlashga yordam berishlariga” yo‘l qo‘ymasliklarini yozadi. Franklning maslahati bo‘yicha materiallar The Guardian, The Daily Telegraph va Buyuk Britaniyaning boshqa yetakchi ommaviy axborot vositalarida ham chop etilgan.
AQSHning Britaniyadagi elchixonasi choyga tuz qo‘shish taklifiga o‘ta salbiy munosabatda bo‘lib, “bu ikki davlat munosabatlariga tahdid solishini bildirgan.
“Biz Britaniya fuqarolarini ishontirib aytmoqchimizki, Buyuk Britaniyaning milliy ichimligiga tuz qo‘shish haqidagi aqlbovar qilmaydigan g‘oya Qo‘shma Shtatlarning rasmiy siyosati emas. Hech qachon bo‘lmaydi. Choy – do‘stlik eliksiri, xalqlarimizni birlashtirgan muqaddas rishta. Bunday g‘ayritabiiy taklif Britaniya bilan munosabatlarimiz o‘zagiga tahdid solayotgani uchun jim turolmaymiz”, — deyiladi elchixonaning X (sobiq Twitter) da e’lon qilingan bayonotida.
Amerika elchixonasining fikricha, Franklning “Steeped: The Chemistry of Tea” (Qaynatilgan: choy kimyosi) kitobi nashr etilgandan so‘ng choy tayyorlash bo‘yicha faol muhokama “Buyuk Britaniya bilan bo‘lgan alohida aloqani mustahkamladi”.
“Keling, chuqur birdamligimizda birlashaylik va dunyoga choy haqida gap ketganda, biz hamjihat ekanimizni ko‘rsataylik. AQSH elchixonasi choyni to‘g‘ri usulda — mikroto‘lqinli pechda tayyorlashda davom etadi”, — deya xulosa qiladi Amerika missiyasi.
Choy AQSH va Buyuk Britaniya o‘rtasidagi diplomatik kelishmovchiliklarga birinchi marta sabab bo‘layotgani yo‘q, deb eslaydi Sky News. 1773-yildagi Boston choy ziyofati paytida namoyishchilar Britaniya mahsulotga soliq joriy etganiga norozilik bildirish uchun butun choyni dengizga uloqtirgan. Bu Amerika inqilobini qo‘llab-quvvatlashni kuchaytirgan muhim lahza edi.
Izoh (0)