Toshkent viloyati Angren shahrida amalda bajarilmagan ishlar uchun 670 million so‘mni o‘zlashtirgan shaxslar aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Angren shahar bo‘limi tomonidan tergovga qadar tekshiruv o‘tkazilgan. Tekshiruv davomida “A.I.E.” DUK masʼul shaxslari YTT “U.A.” tuzilgan shartnomaga asosan ekskavator xizmatlari ijarasi uchun ko‘rsatilgan ishlar bajarilmagan bo‘lsa-da, YATT “U.A.” tomonidan 670 million so‘mlik ishlar (xizmatlar) bajarilgani haqida elektron hisob-fakturaga soxta maʼlumotlar kiritilib, o‘zganing mulkini o‘zlashtirish yo‘li bilan talon-toroj qilingani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 209-moddasi (mansab soxtakorligi) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkent shahar Mirobod tumanida majburiy badal va ijara uchun undirilgan mablag‘ni o‘zlashtirgan shirkat aniqlangani, Navoiyda 800 mln, Surxondaryoda esa 741 mln so‘m kredit mablag‘larini o‘zlashtirish holatlari ma’lum bo‘lgani to‘g‘risida xabar berilgandi.
Izoh (0)