IIV Yo‘l harakati xavsizligi Navoiy viloyatida o‘yinchoq pistolet yordamida video olib, uni ijtimoiy tarmoqlarda tarqatgan yigitlar yuzasidan ma’lumot berdi.
Ma’lum qilinishicha, huquqbuzar yigitlar yarim tunda Navoiy shahri G‘alabashoh ko‘chasida Gentra’da qo‘liga qurol olgan holda harakatlanib, holatni videotasvirga olgan. Shundan so‘ng, videoni ijtimoiy tarmoqdagi sahifalariga joylagan.
“Kechki payt jo‘ram mashinangda bitta video olaylik, deb iltimos qildi. Rozi bo‘ldim. Qo‘lida o‘yinchoq pistolet, yuzida esa maska edi. Video Instagram’ga qo‘yilgandan so‘ng, tarqalib ketdi. Bu oddiy pistolet, deb o‘ylab, video olgandik. Buni qonunga xilof deb o‘ylamaganmiz”, — deydi huquqbuzarlardan biri.
Ikkinchi yigitning aytishicha, ular chet el blogerlaridan ilhomlanib, mazkur videoni olgan.
Mazkur ish jinoyat ishlari bo‘yicha Navoiy shahar sudida ko‘rib chiqilgan. Sud qaroriga ko‘ra, ikki huquqbuzar Ma’muriy javobgarlik to‘g‘risidagi kodeksning 183-moddasi (mayda bezorilik) bilan aybli deb topilib, ularga 10 sutka maʼmuriy qamoq jazosi tayinlandi.
Avvalroq Rossiyalik bloger ruxsatsiz Toshkent teleminorasining uchigacha chiqqani, Samarqandda harakatlanayotgan Gentra’dan tanasini chiqarib, soxta dollar sochgan yigitlarga chora ko‘rilgani to‘g‘risida xabar berilgandi.
Izoh (0)