2020-yillar boshidan dunyoning eng boy va eng kambag‘al odamlari daromadlari o‘rtasidagi tafovut keskin oshdi: sayyoramiz aholisining eng kambag‘al 60 foizi yanada qashshoqlashdi, eng boy besh kishi esa yanada boyib ketdi.
The Guardian nashri Oxfam xalqaro tashkiloti hisobotiga tayanib yozishicha, 2020-yildan buyon Yer yuzidagi eng badavlat besh kishining boyligi ikki barobarga oshib, 869 milliard dollarni tashkil qildi. Shu bilan birga, dunyo aholisining eng kam daromadli 60 foizi – 5 milliardga yaqin aholi yanada qashshoqlashdi.
Oxfam ma’lumotlariga ko‘ra, o‘ta boy milliarderlar va dunyoning qolgan aholisi daromadlari o‘rtasidagi katta tafovut o‘sishda davom etadi. 2020-yildan beri barcha milliarderlarning umumiy boyligi 3,3 trillion dollarga oshgan. O‘ta boy biznesmenlarning daromadlari global inflyatsiyadan uch barobar tezroq o‘sdi.
Kelgusi o‘n yil ichida sayyorada trillion dollardan ortiq mablag‘ga ega odam bo‘ladi. Shu bilan birga, global qashshoqlik muammosi kamida yana 229 yil davomida hal etilmaydi. 52 mamlakatda 800 million ishchining o‘rtacha real ish haqi bor-yo‘g‘i ikki yil ichida jami 1,5 trillion dollarga kamaydi.
Tadqiqot mualliflari dunyodagi eng badavlat besh kishi sifatida Ilon Mask (Tesla), Bernard Arno (Louis Vuitton Moet Hennessy), Jeff Bezos (Amazon), Larri Ellison (Oracle) va Mark Sukerberg(Meta)ni sanadi. Ulardan biri birinchi trillionerga aylanishi mumkin. O‘n yillik boshidan buyon ularning boyligi jami 464 milliard dollarga, ya’ni 114 foizga oshgan.
“Eng boy 1 foiz qatlam dunyo moliyaviy aktivlarining 59 foiziga, jumladan aksiyalar, kompaniya aksiyalari va qimmatli qog‘ozlarga egalik qiladi”, — deb ta’kidlaydi The Guardian.
Izoh (0)