Turkmaniston prezidenti Serdar Berdimuhamedov o‘zining ilk kitobini nashr etdi. Bu haqda u 25-dekabr kuni viloyatlar rahbarlari va bosh vazirning agrosanoat kompleksi masalalari bo‘yicha o‘rinbosari ishtirokidagi ishchi yig‘ilishda ma’lum qildi, deb yozadi “Orient.tm”.
Kitob “Ýaşlar – Watanyň daýanjy” (“Yoshlar – yurt tayanchi”) deb nomlanib, unda turkman yoshlari erishgan yutuq va muvaffaqiyatlar haqida hikoya qilinadi.
Kitobning chop etilishi 27-dekabr kuni bo‘lib o‘tadigan “Baxtli yoshlar Arkadag‘ Serdar bilan” yil yakunlariga bag‘ishlangan xalqaro ilmiy-amaliy konferensiya va ko‘rgazmaga to‘g‘ri keldi.
Serdar Berdimuhamedov kitobning birinchi nusxasini otasi, sobiq prezident va amaldagi Turkmaniston Xalq Maslahatiyasi raisi Gurbanguli Berdimuhamedovga yubordi.
“Men ushbu kitobning birinchi nusxasini turkman xalqining milliy yetakchisi Qahramon Arkadag‘ga sovg‘a sifatida yuboryapman”, — deya prezident so‘zlarini keltiradi Turkmenportal.
Eslatib o‘tamiz, Gurbanguli Berdimuhamedov 16 yil davomida o‘z nomi bilan turli mavzularda 60 ga yaqin kitob chop etgan. Ular orasida tibbiyot, falsafa, madaniyat, ma’naviyat mavzulariga oid asarlar, Alabay itlari, Axalteke otlari, sport va Arkadag‘ ajdodlariga bag‘ishlangan bir qator romanlar bor.
Izoh (0)