Tarmoqlarda qashqadaryolik haydovchiga tegishli avtomobil yukxonasida bo‘ri ortilgani tasvirlangan video tarqalgach, Telegram kanallarida shu bo‘rining o‘ldirilgani haqida xabarlar paydo bo‘ldi. Qashqadaryo viloyati Ekologiya, atrof-muhitni muhofaza qilish va iqlim o‘zgarishi boshqarmasi mazkur xabarlarga munosabat bildirib, bo‘ri o‘ldirilmaganini, qochib ketganini ochiqladi.
Dastlabki videoda tutib olingan urg‘ochi bo‘ri uch-to‘rt nafar erkak tomonidan bo‘yniga zanjir bog‘lagan holda mashina yukxonasidan pastga tushirilgani tasvirlangan. Bu paytda atrofda yosh bolalar, ayollar bo‘lgan. Bo‘rining keyingi taqdiri noma’lumligicha qolgan.
Telegram kanallarida tarqalgan boshqa xabarda bo‘ri sim bilan bo‘g‘ib o‘ldirilgani aytilgan. Biroq, xabar manbasi ochiqlanmagan.
Boshqarmaning mazkur xabarga munosabat bildirishicha, holat 12-dekabr kuni o‘rganilgan.
O‘rganish davomida ma’lum bo‘ldiki, G‘uzor tumanining “Yakkadaraxt” mahallasida yashovchi fuqaro R.R. 11-dekabr kuni dalada qo‘y boqib yurganida, qo‘ylariga bo‘ri hujum qilgan. Keyin u ushlanib, uyga olib kelingan va mashinaga bog‘lab qo‘yilgan. Fuqaro ertasi kuni tegishli tashkilotlarga xabar bermoqchi bo‘lganida, bo‘ri 11-dekabr kuni kechki payt qochib ketgani ma’lum bo‘lgan, — deyiladi boshqarma mas’ullari bergan ma’lumotda.
Ta’kidlanishicha, bo‘rining o‘ldirilganligi haqidagi xabarlar asossiz.
Shu o‘rinda yovvoyi hayvonlarga nisbatan shafqatsiz munosabatda bo‘lishni keskin qoralaymiz va bu qonunda belgilangan tartibda qat’iy jazoga sabab bo‘lishini yana bir bor eslatib o‘tamiz, — deydi ekologiya boshqarmasi mas’uli.
Izoh (0)