“Rosatom” O‘zbekistonda quriladigan AES uchun suvni tejash texnologiyasidan foydalanish imkoniyatini ko‘rib chiqmoqda

Rossiyaning “Rosatom” kompaniyasi O‘zbekistonda atom elektr stansiyasini (AES) qurish loyihasiga suvni sovitishga mo‘ljallangan zamonaviy qurilma — “quruq sovitkich” texnologiyasini joriy etish imkoniyatini ko‘rib chiqmoqda. Bu haqda “Rosatom” davlat korporatsiyasi barqaror rivojlanish departamenti direktori Polina Lionning so‘zlariga tayanib, “Interfaks” xabar berdi.

Uning taʼkidlashicha, “O‘zbekistonda suv bilan bog‘liq vaziyat juda og‘ir, chunki 2050-yilgacha mamlakatda suv tugaydi, degan prognozlar mavjud”. “Quruq sovitkich” texnologiyasi esa AESda suv sarfini minimallashtirish uchun yechim berishi mumkin, deb qo‘shimcha qildi Lion BMT iqlim o‘zgarishi bo‘yicha konferensiyasining (COP28) Rossiya pavilyonidagi tadbirda.

“Quruq sovitkich” texnologiyasi bilan AESdagi reaktorni sovitish jarayonida suv bug‘lanib ketmaydi, deb ishoniladi.

Ma’lumot uchun, “Rosatom” O‘zbekistonda VVER-1200 reaktor bloklariga ega ikkita energoblokdan iborat kompleks qurishni rejalashtirmoqda: AES qurilishi bo‘yicha shartnoma yakuniy bosqichda.