Iyul oyida lavozimidan chetlashtirilgan sobiq Xitoy tashqi ishlar vaziri Sin Gan qiynoqlar yoki o‘z joniga qasd qilish oqibatida vafot etdi. U mamlakatning yuqori amaldorlari davolanadigan Pekin harbiy gospitalida hayotdan ko‘z yumgan. Bu haqda Politico yuqori martabali Xitoy rasmiylariga yaqin manbalarga tayanib, xabar berdi.
Sin Gan 25-iyun kuni shri-lankalik hamkasbi Muhammad Ali va Rossiya tashqi ishlar vaziri o‘rinbosari Andrey Rudenko bilan uchrashganidan so‘ng to‘satdan g‘oyib bo‘lgandi.
Politico manbalariga ko‘ra, Rossiya vaziri o‘rinbosari Pekinga tashrifi chog‘ida Xitoy raisi Si Szinpinga “XXR tashqi ishlar vaziri va bir necha yuqori martabali xitoylik harbiy ofitserlar G‘arb razvedka idoralari bilan til biriktirgani” haqida xabar bergan. Gap raketa qo‘shinlari bosh qo‘mondoni Li Yuchao, uning o‘rinbosari Lyu Guanbin, tashqi ishlar vaziri Sin Gan va u bilan bir vaqtda omma ko‘zidan g‘oyib bo‘lgan sobiq o‘rinbosari Chjan Chjenchjun haqida ketmoqda. Rudenko ular Xitoyning “yadroviy sirlarini” G‘arb razvedkasiga topshirganini aytgan, deb yozadi Politico.
Nashr xabariga ko‘ra, Xitoy raisi yuqori martabali amaldorlar safini xiyonatda gumon qilinganlardan tozalamoqda. Bu yil yana bir qancha amaldagi va iste’fodagi yuqori martabali armiya zobitlari hibsga olingan va kamida bitta sobiq qo‘mondon o‘rinbosari “noaniq kasallik” tufayli vafot etgan.
Bundan tashqari, nashrning yozishicha, Si Szinpin 2012-yilda hokimiyat tepasiga kelganidan beri yuzlab yuqori martabali armiya zobitlari va minglab partiya amaldorlari hibsga olingan, g‘oyib bo‘lgan yoki “o‘z joniga qasd qilgan” — ular o‘z joniga qasd qilishga majburlangan yoki ularning qotilligi o‘z joniga qasd qilish deb topilgan.
Avval The Wall Street Journal Sin Gan amerikalik ma’shuqasi tufayli ishdan bo‘shatilgani haqida xabar bergandi.
Izoh (0)