Psixologiya pul ishlash manbaiga aylantirib yuborilmoqda. Bu haqda Asab va ruhiyat ilmiy-tibbiy markazi direktori, professor Zarifboy Ibodullayev “Daryo” nashriga bergan qisqacha intervyusida aytib o‘tdi.
Psixogenetiklar paydo bo‘lganmish. Ular bolaning tug‘ilishiga ham taʼsir qilamiz, hayotingizni ham, geningizni ham o‘zgartirib yuboramiz, deb vaʼdalar berishmoqda ekan. Bunday xizmat uchun shunaqa katta summalarni qo‘yishgan deyishadi, yoqa ushlaysiz.
Bu masalani Sog‘liqni saqlash vazirligida ham ko‘taryapmiz, umumiy psixologlar bilan ham gaplashdik. Ularni nazoratga oladigan tizimni yo‘lga qo‘ymasak bo‘lmaydi. Baʼzi psixologlar suhbatidan keyin oilalar buzilib ketyapti. “Psixolog suhbatidan keyin ayolim o‘zgarib qoldi”, deb bizga murojaatlar bilan kelishmoqda, — dedi professor.
Olimning aytishicha, hozir chet elda psixologik kurslar ko‘payib ketgan bo‘lib, 600 dollar evaziga masofadan o‘qib, diplom olish mumkin.
Men masofaviy taʼlimga qarshi emasman, lekin ularda malaka yo‘q. Hattoki oliy taʼlim tizimida o‘qimagan, ishlamagan. O‘qigan bo‘lsa ham boshqa sohada o‘qib, pul ishlash uchun shu sohaga kirgan. Gapga ustaligi, chechanligidan foydalanib, ko‘plab ayollarimiz o‘zicha psixolog bo‘lib qolishmoqda.
Umuman professionalizm yo‘q, psixogenetika nimaligini, etnopsixologiyani o‘zi bilmaydi. Oqibatda oilalarda katta muammolar paydo bo‘lmoqda, — dedi Zarifboy Ibodullayev.
Izoh (0)