Toshkentdagi xususiy bog‘chada tarbiyachining qo‘pol harakati oqibatida bolaga tan jarohati yetkazildi. Bu haqda bolalar ombudsmani xabar berdi.
Jabrlangan bolaning onasining aytishicha, voqea 17-noyabr kuni yuz bergan. U o‘z ijtimoiy tarmoqdagi sahifasida bog‘chada olingan video, shifokor xulosasini e’lon qilgan. Videoda tarbiyachi karavotda o‘tirgan bolani bir qo‘lidan ko‘tarib, boshqa joyga olib ketgani aks etgan.
Onaning so‘zlariga ko‘ra, shu kuni bola kun bo‘yi, ayniqsa, chap qo‘liga tegilganida yig‘lagan. Bola shifokor ko‘rigiga olib borilganida suyak sinishi tashxisi qo‘yilgan va bolaning qo‘li gipslangan.
30-noyabr kuni bolalar ombudsmaniga ayolning bu haqdagi murojaati kelib tushgan. Hozirda mazkur holat yuzasidan Yakkasaroy tumani IIB tomonidan tergovga qadar tekshiruv ishlari olib borilmoqda.
Izoh (0)