“O‘zgidromet” kuzning so‘nggi kunlari qanday ob-havo bo‘lishini ma’lum qildi

“O‘zgidromet” noyabr oyining so‘nggi kunlari va dekabr oyining boshi uchun ob-havo prognozini e’lon qildi.

Unga ko‘ra, 27—28-noyabr kunlari O‘zbekiston hududining katta qismida quruq va iliq ob-havo saqlanib turadi, havo harorati 20-25 darajagacha iliq bo‘ladi. 28-noyabrda faqat Qoraqalpog‘iston Respublikasi, Xorazm viloyatining baʼzi joylarida biroz yomg‘ir yog‘adi. Shimolda va cho‘l hududlarda shamol 15-20 metr/sekundgacha kuchayishi mumkin.

29-noyabrda shimol-g‘arbiy hududlaridan nam havo oqimi kirib kelishi va respublika hududining katta qismida tarqalishi kutilmoqda. Respublika hududi bo‘yicha baʼzi joylarda yomg‘ir yog‘adi, shamol kuchayadi. Qoraqalpog‘iston Respublikasi, Xorazm viloyati va Farg‘ona vodiysida yog‘ingarchilik kutilmaydi.

30-noyabrda yomg‘ir faqat Farg‘ona vodiysi viloyatlarida yog‘adi, boshqa hududlar uchun yog‘ingarchilik kutilmaydi.

1-dekabrda butun hudud bo‘ylab quruq ob-havo kuzatiladi.

29-noyabrdan havo harorati pasayishni boshlaydi va ish haftasining ikkinchi yarmida kechasi 2-7 daraja, kunduzi 10-15 daraja iliq, Respublikaning shimoliy hududida harorat kechasi 0-5 daraja sovuq,  kunduzi 5-10 daraja iliqni tashkil etadi.

Toshkentda 27—28-noyabr kunlari yog‘ingarchilik kutilmaydi. Harorat kunduzi 21-24 daraja iliq bo‘ladi. 29-noyabrda vaqti-vaqti bilan yomg‘ir yog‘adi. Harorat 15-17 daraja iliq bo‘ladi. 30-noyabr va 1-dekabrda yog‘ingarchilik kutilmaydi. Havo harorati kechalari 2-7 daraja, kunduzi 10-15 daraja iliq bo‘ladi.