O‘zbekiston va Italiya o‘rtasida mahkumlarni topshirish to‘g‘risidagi shartnoma ratifikatsiya qilindi. Bu Italiyada qamoqda qolayotgan o‘zbekistonliklarga qanday taʼsir ko‘rsatdi?

Oliy Majlis Senatining qirq yettinchi yalpi majlisida O‘zbekiston bilan Italiya Respublikasi o‘rtasida ushlab berish, mahkumlarni topshirish, jinoiy ishlar bo‘yicha o‘zaro huquqiy yordam to‘g‘risidagi shartnomalarni ratifikatsiya qilish haqidagi qonunlar ko‘rib chiqib, maʼqullandi.

Muhokamalar chog‘ida senator Tolibjon Madumarov O‘zbekiston bilan Italiya o‘rtasida mahkumlarni topshirish to‘g‘risidagi Shartnoma ratifikatsiya qilinishi Italiyaning jazoni ijro etish muassasalarida jazo o‘tayotgan O‘zbekiston fuqarolariga qanday taʼsir qilishi xususida savol berdi.

Savolga Bosh prokuratura masʼul xodimining javob berishicha, bugungi kunda Italiyada jazoni ijro etish muassasalarida 20 nafarga yaqin O‘zbekiston fuqarosi jazo o‘tamoqda.

“Diplomatik missiyalarimiz ko‘magida ularning ahvolidan doimiy ravishda xabar olib kelinmoqda.

Shartnomalarning ratifikatsiya qilinishi jazoni o‘tayotgan fuqarolarimiz uchun ijobiy taʼsir ko‘rsatadi. Birinchi navbatda, ushbu fuqarolar o‘z xohishiga ko‘ra, O‘zbekistonda jazoni davom ettirish huquqiga ega bo‘ladi. Bu mahkumlar va ularning oila aʼzolari uchun qulaylik tug‘diradi. Boisi ularning doimiy ravishda bir-birlari bilan ko‘rishib turishlariga oilaviy munosabatlar saqlab qolinishiga xizmat qiladi.

Ikkinchi tomondan, ularning ijtimoiy reabilitatsiyasiga ham yaxshi taʼsir ko‘rsatadi”, — dedi Bosh prokuratura xodimi.

Qo‘shimcha qilinishicha, mazkur ratifikatsiyalar O‘zbekistonning xalqaro obro‘siga ham ijobiy taʼsir ko‘rsatadi. Sababi “O‘zbekiston fuqarolarini tashlab qo‘ymaydi”, degan tamoyil amalda tatbiq etiladi.

Avvalroq yalpi majlisda Senat O‘zbekiston va Qozog‘iston ittifoqchilik munosabatlariga oid shartnomani ma’qullagan edi.