“Xovrenko” nomidagi Samarqand vino kombinatida qalbaki aksiz markali alkogol mahsulotlari ishlab chiqarilayotgani aniqlandi, deb xabar beradi Bosh prokuratura huzuridagi departament.
Qayd etilishicha, departamentning Samarqand viloyat boshqarmasi va IIB JQB xodimlari hamkorligida tezkor tadbir o‘tkazilgan. Tadbirda Samarqand tumani “Qoziariq” mahallasidagi xonadonlardan birida yashovchi Z.U. o‘z uyi omborxonasida qalbaki aksiz markalar bilan yelimlangan 25 ming dona “Vodka Russkaya premium” nomli arog‘ini, 9 ming dona “Samarqand” konyagini, 8 760 dona “Portveyn 53” nomli vinosini hamda 468 dona “Stariy Samarkand” nomli konyagini sotish maqsadida saqlab kelayotgani aniqlangan.
Ushbu qalbaki aksiz markali mahsulotlarning kelib chiqish manbasini aniqlash maqsadida davom etgan tadbirda, fuqaro Z.U.ga alkogolli mahsulotlarni “Xovrenko” nomidagi Samarqand vino kombinati AJning direktori o‘rinbosari A.O. yetkazib bergani maʼlum bo‘lgan.
Kombinat omborxonasi ko‘zdan kechirilganda ushbu omborxonadan qalbaki aksiz markali 8 940 dona “Portveyn 53” vinosi, 5 ming dona qopqoq, 9 ming dona yorliq va 20 150 dona alkogol shisha idishlari mavjudligi aniqlanib, tadbir yakunida jami 631,7 million so‘mlik tovar moddiy boyliklar ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Qoraqalpog‘iston Respublikasi va Farg‘ona viloyatida qalbaki aksiz markali alkogol mahsulotlarini muomalaga kiritilishining oldi olingani to‘g‘risida xabar berilgandi.
Izoh (0)