Harbiy sohaning bir necha yo‘nalishlarida xizmat qilgan xodimlar ish staji uch hissa ko‘proq qo‘shib hisoblanadi. Bu haqda Pensiya jamg‘armasi maʼlumot berdi.
Harakatdagi armiya tarkibiga kiruvchi harbiy qismlar, shtablar va muassasalarda, jangovar harakatlar davrida partizan otryadlari va qo‘shilmalaridagi xizmat va erkin yollanganlar tarkibida ishlagan, baynalmilal burchni bajarishda jangovar harakatlarda ishtirok etgan davri uchun xodimga — uch hissa barobarida ish stajiga qo‘shib hisoblanadi.
“Bunda 1 yil ushbu turdagi xizmatda bo‘lgan fuqaroning mehnat staji 3 yil deb hisoblanadi”, — deyiladi jamg‘arma xabarida.
Avvalroq ish staji kimlarga ikki barobar qo‘shib hisoblanishi xabar qilingandi. Unga ko‘ra, moxovxonalarda, vaboga qarshi muassasalarda, immunitet tanqisligi virusi bilan kasallangan shaxslar davolanadigan yuqumli kasalliklar muassasalarida ishlaganlik uchun — ikki hissa barobarida ish stajiga qo‘shib hisoblanadi.
Shu bilan birga, kimlar o‘n yil oldin pensiyaga chiqishi mumkinligi to‘g‘risida ham maʼlumot berilgan. Jumladan, oxirgi ish joyidan qatʼi nazar yerosti ishlarida, mehnat sharoiti o‘ta zararli va o‘ta og‘ir ishlarda to‘liq ish kuni davomida band bo‘lgan xodimlarga umumiy belgilangan yoshni 10 yilga qisqartirilgan holda pensiya olish huquqi beriladi. Shuningdek, sirklar va konsert tashkilotlari artistlarining ayrim toifalari ijodiy ishdagi staji kamida 20 yil bo‘lgan taqdirda 10 yilga qisqartirilgan holda pensiya olish huquqiga ega bo‘ladi.
Izoh (0)