Qatarning Qatar National Cement kompaniyasi O‘zbekistonda qurilish materiallari ishlab chiqarish loyihalarida ishtirok etadi.
Investitsiyalar, sanoat va savdo vazirligining xabar qilishicha, Laziz Qudratov ushbu kompaniya ijrochi direktori Essa Kaldari bilan muzokaralar o‘tkazdi. O‘zaro manfaatli hamkorlikni yanada kengaytirish masalalari muhokama qilindi, qurilish materiallari ishlab chiqarish bo‘yicha qo‘shma loyihalarni amalga oshirish istiqbollari ko‘rib chiqildi.
Tomonlar hamkorlikni yanada rivojlantirish va muhokama qilingan barcha loyihalar bo‘yicha ishlarni tezroq boshlash yuzasidan qo‘shma choralar ko‘rishga kelishib oldi.
Undan bir kun avval esa Qatar National Cement kompaniyasi vakillari Qurilish materiallari sanoatini rivojlantirish bo‘yicha kengash uyushmasi rahbariyati bilan uchrashgan.
Uchrashuvda hududlardagi mavjud xom ashyo zaxirilaridan foydalanib, qurilish materiallari sanoatida innovatsion, energiya tejamkor, eksportbop va import o‘rnini bosuvchi investitsion qo‘shma loyihalarni amalga oshirishga kelishildi. Shuningdek, kadrlar tayyorlashda yuqori malakali mutaxassislarini jalb qilish, xalqaro akkreditlangan sinov laboratoriyalari o‘rtasida o‘zaro tajriba almashinuvini yo‘lga qo‘yish yuzasidan qator kelishuvlarga erishildi.
Maʼlumot uchun, Qatar National Cement kompaniyasi 1965-yildan buyon faoliyat yuritadi va qurilish materiallari ishlab chiqarish bo‘yicha mintaqadagi yirik kompaniyalar sirasiga kiradi. Qatarning sementga bo‘lgan talabning 100 foizini qoplaydi. Yillik ishlab chiqarish quvvati 8 million tonna. Yillik daromadi 1 milliard dollar (2022-yil), ishchilar soni 2 ming kishi.
Izoh (0)