Genuine Impact jamoasi bitta film uchun eng ko‘p haq olgan aktyorlar reytingini tuzib chiqdi. Reytingni tayyorlashda “Vikipediya”dagi maʼlumotlardan foydalanilgan.
Unga ko‘ra, kino tarixida bitta film uchun eng ko‘p haq olgan aktyor Kianu Rivz hisoblanadi. “Matritsa”ning davomi sifatida taqdim etilgan film uchun aktyorga 156 million dollar miqdorida gonorar to‘langan. Ushbu summa namoyishlardan tushgan daromad foizi va avansni ham o‘z ichiga olgan.
Rivzdan keyingi o‘rinda esa 1999-yili “Oltinchi hissiyot” filmidagi roli uchun 100 million dollar miqdorida haq olgan Bryus Uillis ismi qayd etilgan.
Uchinchni o‘rinni Gollivud yulduzi Tom Kruz egalladi. U o‘zining aktyorlik faoliyati davomida 3 marta 100 million dollar miqdorida gonorar olgan. Bular – “Top Gan: Meverik”, “Dunyolar jangi” va “Bajarib bo‘lmas topshiriq — 2” filmlari bo‘lgan. Bundan tashqari, Kruz franshizaning birinchi qismi uchun to‘langan 70 million dollar miqdoridagi gonorar bilan reytingning 7-o‘rnini ham band etgan.
Uill Smit “Qora libosdagi odamlar-3” filmi uchun 100 million dollar (4-o‘rin), Robert Dauni-kichik “Temir odam-3”, “Qasoskorlar: Abadiylik jangi” va “Qasoskorlar: Intiho” filmlari uchun 75 million dollardan gonorar olgan.
Reytingning umumiy ko‘rinishi quyidagicha:
1. Kianu Rivz (“Matritsa: Qayta yuklash”, “Matritsa: Inqilob” – 156 million)
2. Bryus Uillis (“Oltinchi hissiyot” – 100 million)
3. Tom Kruz (“Top Gan: Meverik”, “Dunyolar jangi”, “Bajarib bo‘lmas topshiriq-2” – 100 million)
4. Uill Smit (“Qora libosdagi odamlar-3” – 100 million)
5. Robert Dauni-kichik (“Temir odam-3”, “Qasoskorlar: Abadiylik jangi”, “Qasoskorlar: Intiho” – 75 million)
6. Sandra Bullok (“Gravitatsiya” – 70 million)
7. Tom Xenks (“Forrest Gamp” – 70 million)
8. Tom Kruz (“Bajarib bo‘lmas topshiriq” – 70 million)
9. Xarrison Ford (“Indiana Jons va billur bosh suyak qirolligi” – 65 million)
10. Jek Nikolson (“Betmen” 1989-yil – 60 million)
Izoh (0)