BMT Bosh assambleyasi G‘azo sektorida o‘t ochishni to‘xtatishga chaqiruvchi rezolyutsiyani qabul qildi

Birlashgan Millatlar Tashkiloti Bosh assambleyasi G‘azo sektorida zudlik bilan o‘t ochishni to‘xtatishga chaqiruvchi rezolyutsiyani qabul qildi.

Iordaniya taklif qilgan hujjatni qo‘llab 120 ta davlat, jumladan, O‘zbekiston ovoz berdi, 14 ta mamlakat, jumladan, AQSH va Isroil qarshi chiqdi, yana 45 tasi jumladan, Buyuk Britaniya, Kanada, Hindiston va Ukraina betaraf qoldi.

Bosh assambleya, shuningdek, Kanada tomonidan taklif qilingan rezolyutsiyaga HAMASning Isroilga hujumi va odamlarni garovga olishdagi harakatlarini qoralovchi tuzatishni rad etdi.

Times of Israel ta’kidlaganidek, bu tashabbus sof ramziy ahamiyatga ega, biroq ovoz berish natijalari dunyoda falastinliklarni qo‘llab-quvvatlash qanchalik kuchli ekanini ko‘rsatadi.

Isroil kuchlari 27-oktyabr oqshomida G‘azo sektorida quruqlikdagi operatsiyani “kengaytirayotgani”ni, shuningdek, havodan, yerdan va dengizdan hujumlar intensivligini oshirdi. Isroil armiyasi “kengayish” nimani anglatishiga aniqlik kiritimadi. Mutaxassislarning fikricha, jangovar harakatlarning kuchayishi hali keng ko‘lamli bosqinning boshlanishi, degani emas.