Navoiy viloyati hokimi o‘rinbosari Qiziltepa tumani, IIB boshlig‘i o‘rinbosari esa Xatirchi tumani hokimi etib tayinlandi

Bekzod  Bobomurodov Qiziltepa tumani hokimi lavozimiga tayinlandi. Bu haqda Navoiy viloyati hokimligi matbuot xizmati xabar berdi.

Bekzod Bobomurodov 1983-yilda Qiziltepa tumanida tug‘ilgan. Xo‘jand davlat universiteti hamda Toshkent moliya institutini tamomlagan.

Mehnat faoliyati davomida u Isteʼmolchilar huquqlarini himoya qilish federatsiyasi Navoiy viloyati hududiy birlashmasi raisi, Navoiy viloyati qurilishda tanlov savdolari va narxlarni shakllantirish hududiy konsalting markazi direktori, “Qishloq qurilish invest” MCHJ injiniring kompaniyasi Navoiy viloyat filiali direktori kabi masʼul lavozimlarda ishlagan.

Tayinlovga qadar Navoiy viloyati hokimining qurilish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari lavozimida faoliyat yuritgan.

Qiziltepa tumaniga 2021-yil noyabr oyidan buyon Ulug‘bek Fayziyev hokim bo‘lib kelayotgandi. Navoiy viloyati hokimining qarori bilan u 23 oktyabrdan lavozimdan ozod etilgan.

Shuningdek, Navoiy viloyat IIB boshlig‘i o‘rinbosari, polkovnik Umidjon Adizov Xatirchi tumani hokimi etib tayinlandi.

Xatirchi tumaniga 2021-yil martidan buyon hokim bo‘lgan Sayfiddin Nizomov 2023-yil 11-iyul kuni prezident Shavkat Mirziyoyev raisligida o‘tkazilgan videoselektor yig‘ilishida ishdan olingandi.