O‘zbekistonda paxtaning taxminiy narxlari e’lon qilingani yuzasidan ma’lumot berildi

Ijtimoiy tarmoqlarda “paxta tolasining taxminiy narxlari e’lon qilindi” mazmunidagi xabarlar tarqaldi. Qishloq xo‘jaligi vazirligi tarmoqlarda tarqalgan xabarga aniqlik kiritdi.

Qayd etilishicha, Qishloq xo‘jaligi vazirligi sohada olib borilayotgan islohotlarni qo‘llab-quvvatlash, muammolarni o‘rganish va bartaraf etish yuzasidan ochiq muloqotga har doim tayyor. Shunday bo‘lsa-da, ijtimoiy tarmoqlarda ba’zi ma’lumotlarni oxirigacha o‘rganib chiqilmasdan, bir yoqlama yondashuv asosida keng ommaga taqdim etish holatlari uchramoqda. Qishloq xo‘jaligi vazirligi ijtimoiy tarmoqlarda tarqatilgan xabarni atroflicha va xolis o‘rganib chiqqan holda, quyidagilarni ma’lum qildi:

Paxta tolasi narxlari Nyu-York birjasi e’lon qilgan kotirovka va uning formulasi orqali hisob-kitob qilinadi. Unga muvofiq, paxtaga narx belgilash tomonlarning o‘zaro manfaatli kelishuvi asosida amalga oshiriladi. Hozirgi tarqalgan xabarlar haqiqatga to‘g‘ri kelmaydi.