AQSH Savdo vazirligi Rossiya mudofaa-sanoat majmuasini qo‘llab-quvvatlagan 42 ta Xitoy kompaniyasini eksport nazorati ro‘yxatiga kiritdi. Bu boradagi tegishli ogohlantirish AQSH Federal reyestriga joylangan.
Cheklovlar, jumladan, Rossiya Ukrainadagi tinch aholi nishonlariga hujum qilishda foydalanadigan raketa va uchuvchisiz uchish qurilmalarini boshqarish tizimlarida qo‘llanadigan Amerika mikrochiplari yetkazib berilgani bois ham joriy etilgan.
Eksport nazorati ro‘yxatiga, shuningdek, Finlyandiya, Germaniya, Hindiston, Turkiya, BAA va Buyuk Britaniya kompaniyalari ham kiritilgan.
“Bugun ro‘yxatning to‘ldirilishi aniq signalni beradi: agar Rossiya mudofaa sektoriga Amerikada ishlab chiqarilgan texnologiyalar yetkazib berilsa, biz buni aniqlaymiz va chora ko‘ramiz”, — deydi AQSH savdo vaziri o‘rinbosari Metyu Akselrod.
Eksport nazorati ro‘yxatiga kiritilish endilikda reyestrdagi tashkilotlar tovarlarni yuborishda “olinishi qiyin bo‘lgan litsenziyani” taqdim etishi kerak bo‘ladi.
Eslatib o‘tamiz, 19-iyul kuni The Washington Post gazetasi AQSH Rossiyaga nisbatan joriy etilgan sanksiyalarni buzgani uchun Qirg‘izistonga qarshi iqtisodiy choralar ko‘rayotgani haqida xabar bergandi. Nashrning yozishicha, Vashington Bishkekni Rossiyaga Xitoy dronlarini yetkazib berishda gumon qilmoqda.
Izoh (0)