Fanlar akademiyasi akademigi, taniqli fizik olim Nazar To‘rayev 3-oktyabr kuni 85 yoshida vafot etdi. Bu haqda O‘zbekiston Fanlar akademiyasi xabar berdi.

Nazar To‘rayev 1938-yili Denov tumanida tug‘ilgan. Fizik olim, O‘zbekiston Fanlar akademiyasi akademigi (2000), O‘zbekistonda xizmat ko‘rsatgan fan arbobi (1988), fizika-matematika fanlari doktori (1980), professor (1982).

Nazar To‘rayevning ilmiy ishlari atom zarralarning qattiq jismlar sirtida sochilishi nazariyasi, ionlarning birlamchi va ikkilamchi sochilishiga oid. U nazariy fizika masalalarini kompyuterda algoritmlab yechishni O‘zbekistonda birinchi bo‘lib amalga oshirgan. Uning rahbarligida lazer nuri bilan qishloq xo‘jalik ekinlari urug‘larini nurlantirish ilmiy laboratoriyalari tashkil etilgan. O‘zbekiston Oliy Kengashi deputati (1990-95). “Mehnat shuhrati” ordeni bilan mukofotlangan (1998).

Aprel oyida O‘zbekiston Fanlar akademiyasi akademigi Habibulla Akbarov 87 yoshida vafot etgandi. Undan oldin esa Genetika va o‘simliklar eksperimental biologiyasi sohasida dunyoga tanilgan olim akademik Abdumavlon Abdullayev 92 yoshida, akademik Turg‘unpo‘lat Daminov bo‘lsa 81 yoshida olamdan o‘tgan edi.