Senatning qirq beshinchi yalpi majlisida “Prokuratura to‘g‘risida”gi qonuniga qo‘shimcha va o‘zgartirishlar kiritishga oid qonun ko‘rib chiqildi. Bu haqda parlament yuqori palatasi matbuot xizmati xabar berdi.
Qonun bilan “Prokuratura to‘g‘risida”gi qonuniga Qurolli kuchlar tizimida qonunchilik hujjatlariga so‘zsiz rioya etilishi ustidan harbiy prokuratura organlarining nazorati kuchaytirilishini, shuningdek, harbiy prokuratura organlariga xodimlarni harbiy xizmatga qabul qilish va undan bo‘shatish tartibi hamda ularga harbiy unvonlar berish tartibi belgilanishini nazarda tutuvchi qo‘shimcha va o‘zgartirishlar kiritilmoqda.
Bosh prokuror, harbiy prokuror, transport prokurori Qoraqalpog‘iston Respublikasi prokurori, viloyatlar va Toshkent shahar prokurorlari, shuningdek, tumanlar, shaharlar prokurorlari lavozimiga 25 yoshdan kichik bo‘lmagan shaxslar tayinlanishi belgilanmoqda.
Bundan tashqari, harbiy prokuror, yransport prokurori, viloyatlar va Toshkent shahar prokurorlari tegishincha tumanlar, shaharlar prokuratoralarining va ularga tenglashtirilgan prokuraturalarning faoliyatiga rahbarlik qilishi, qonunlarga, bosh prokuror buyruqlariga asosan va ularni ijro etish maqsadida o‘ziga bo‘ysunuvchi xodimlar uchun majburiy bo‘lgan buyruqlar, ko‘rsatmalar, farmoyishlar chiqarish vakolatlari qonuniy jihatdan belgilab qo‘yilmoqda.
Majlisda savol-javob va muhokamadan so‘ng ushbu qonun senatorlar tomonidan maʼqullandi.
Bundan oldin O‘zbekistonda harbiy prokuratura xodimlariga ham imtiyozli ipoteka kreditlari berilishi ma’lum qilingandi.
Izoh (0)