Norvegiya 3-oktabrdan boshlab Rossiya davlat raqamlariga ega avtomobillarni mamlakatga olib kirishni taqiqlaydi, deb xabar qildi qirollik Tashqi ishlar vazirligi.
Cheklov to‘qqiz nafargacha yo‘lovchi sig‘imiga ega yengil avtomobillarga nisbatan qo‘llanadi.
“Chegarani, masalan, mikroavtobuslar va avtobuslar orqali kesib o‘tish mumkin”, — deyiladi xabarda.
Shu bilan birga, Norvegiya fuqarolari yoki Yevropa iqtisodiy hududi davlatlarining Rossiyada doimiy yashovchi fuqarolari va ularning qarindoshlariga tegishli avtomobillar uchun ham istisno joriy qilingan. Bundan tashqari, cheklovlar diplomatik transport va xalqaro tashkilotlarga tegishli transport vositalariga taalluqli emas. Gumanitar sabablar bilan ham istisnolar bo‘lishi mumkin, deb aniqlik kiritdi vazirlik.
2023-yil sentabr oyi boshida Yevrokomissiya Yevropa Ittifoqiga a’zo davlatlar Rossiyadan tovarlar, jumladan, avtomobillarni olib kirishga taqiqni qanday qo‘llash kerakligi haqida tushuntirishlar berdi. Shundan so‘ng, Latviya, Litva, Estoniya, Polsha va Finlyandiya Rossiya davlat raqamlariga ega avtomobillarni o‘z hududiga kirishini taqiqladi.