“Daryo” muxbiri Sergelidagi portlashdan jabr ko‘rgan aholi vakillaridan biri bilan suhbatlashdi. 

Suhbat davomida mazkur hududda yashovchi Islom Mirzayev portlash omborxona hududidagi yong‘indan keyin sodir bo‘lganini aytdi. Uning so‘zlariga ko‘ra, yong‘in bo‘layotganini ko‘rgan va videoga ola boshlagan. 5-10 daqiqadan keyin esa portlash sodir bo‘lgan. 

“Yong‘in bo‘layotganini ko‘rdim, derazadan videoga olayotgan edim, birdan ombor portlab ketdi. O‘zimni ham orqaga otib yubordi. Yong‘inni ko‘rganimdan keyin 5-10 daqiqadan keyin portladi”, — deydi u.

Yana bir portlashdan jabr ko‘rgan aholi vakilining taʼkidlashicha, masʼullar hamma zararni qoplab, har qanday yordam berishga tayyor ekanini aytgan. 

“Oyna sinib, menga va 4 yoshli farzandimga biroz zarar yetdi. Masʼullar hamma zararni qoplab, har qanday yordam berishga tayyor ekanini aytishdi”, — deydi fuqaro.

Sergeli tumanida kuchli portlash

Toshkent shahri Sergeli tumanidagi “Quruvchilar” dahasida Inter Logistics MCHJga qarashli omborxonada kuchli portlash va yong‘in 28-sentyabr kuni tunda sodir bo‘lgandi. Hodisa oqibatida jabrlanganlarning umumiy soni 163 kishini tashkil etdi, bir nafar o‘smir hodisa oqibatida vafot etdi. Mazkur holat yuzasidan IIV Tergov departamenti tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a” va ”b” bandlari bilan jinoyat ishi qo‘zg‘atildi.

Sodir bo‘lgan favqulodda hodisani o‘rganish, ko‘rilgan talafotlarni bartaraf etish va jabrlanganlarga yordam ko‘rsatish bo‘yicha prezident topshirig‘iga ko‘ra hukumat komissiyasi tuzildi. Unga ko‘ra, komissiya favqulodda holat oqibatida zarar yetkazilgan har bir uy-joyni, jumladan, aholi xonadonlari, ko‘p qavatli uy-joylarning fasad qismlari, deraza va romlari hamda ta’mirtalab ahvolga kelib qolgan boshqa bino va inshootlarga yetkazilgan zararlarni bartaraf etish bo‘yicha moddiy yordam ko‘rsatish choralarini ko‘radi.