Sergelidagi portlash hududini tozalash ishlari boshlandi — fotoreportaj

Toshkent shahrining Sergeli tumanidagi “Quruvchilar” dahasida joylashgan Inter Logistics MCHJga qarashli omborxonada kuchli portlash sodir bo‘lgani to‘g‘risida xabar berilgandi. Hodisa joyiga yetib borgan “Daryo” muxbiriga ko‘ra, hozirda hududda portlash oqibatlarini bartaraf etish ishlari amalga oshirilmoqda.

Portlashdan so‘ng kuchli yong‘in ro‘y bergan, u haligacha to‘liq o‘chirilmagan. Portlash to‘lqini ko‘p qavatli uylardagi o‘nlab xonadonlarning oynalarini sindirgan.

Voqea joyida ko‘plab huquq-tartibot idoralari xodimlari va maxsus xizmatlar bo‘lib turibdi. Omborxonada sodir bo‘lgan yong‘inni o‘chirishga Mudofaa vazirligi vertolyoti jalb etilgan. Voqea joyiga O‘zbekiston bosh vaziri Abdulla Aripov ham yetib kelgan. Ayni vaqtda yetkazilgan zarar va jabrlanganlar soni aniqlanmoqda.

Toshkent hokimligi Sergelidagi portlash bo‘yicha vaziyat to‘liq nazoratga olinganini ma’lum qildi. Toshkent shahar hokimi vazifasini bajaruvchi Shavkat Umurzoqovning qayd etishicha, portlashda jabrlangan uy egalariga yetkazilgan zarar qoplanadi.

• Sog‘liqni saqlash vazirlining maʼlum qilishicha, portlash oqibatida jarohatlanganlar Respublika shoshilinch tibbiy yordam ilmiy markazi va uning Toshkent viloyati filialiga olib kelingan.
• Uzbekistan Airports ga ko‘ra, Toshkentdagi portlash poytaxt aeroporti faoliyatiga taʼsir qilmagan.
• Voqea poytaxt aeroporti faoliyatiga taʼsir ko‘rsatmagan, “Toshkent” xalqaro aeroporti cheklovlarsiz odatiy rejimda ishlamoqda.