Toshkent shahrining Sergeli tumanidagi “Quruvchilar” dahasida joylashgan omborxonada portlash sodir bo‘ldi. Natijada 15 yoshli bola o‘ldi, minglab xonadonlarga zarar yetdi. “Daryo” muxbiri voqea joyida bo‘lib, voqea haqida reportaj tayyorladi. 

“Qattiq silkinishdan uyg‘ondik, juda baland ovoz va yorug‘ edi” 

Voqea kechasi 02:30—03:00 atrofida sodir bo‘ldi. Birinchi qattiq silkinishdan uyg‘ondik, juda baland ovoz, yorug‘ bo‘lib ketdi. Qarasak, portlash sodir bo‘lgan ekan. Oynalar sindi. Menga va katta o‘g‘limga zarar yetdi. Shundan so‘ng bolalarimizni kiyintirib, pastga olib tushdik. Xavfsizroq bo‘lgan joy — mashinamga chiqib o‘tirdik, — deydi Salohiddin Qarshiboyev. 

“Portlash zarbidan yiqilib tushdim”

Uxlamay o‘tirgandim, adashmasam, soat 02:30 larda omborxonada yong‘in bo‘layotgandi. Men voqeani tasvirga ola boshladim. Ko‘p o‘tmay, portlash sodir bo‘ldi. Uyimiz derazasi oldida tasvirga olayotgan bo‘lsam, portlash zarbi meni orqaga otib yubordi. Derazalar sindi, oilamiz bilan ko‘chaga chiqdik. Ombor uzoq yondi, — deydi voqeaga guvoh bo‘lgan Islom Mirzayev.

“Hamma narsa singandi”

Kechasi soat 02:30 lardan so‘ng yer qimirlagandek silkinish sodir bo‘ldi. Nima bo‘layotganini bilmadik. Bolalarimiz ustiga oynalar tushgan. Hamma narsa singandi. Shovqin-suron bilan ko‘chaga chiqdik. Ko‘chaga chiqib bilsak, yer qimirlamayapti, yong‘in sodir bo‘layotgan ekan, — deydi Dilfuza Atayeva. 

“Bang‘illagan ovoz eshitildi, o‘rnimdan turib, uyning siltanishini ko‘rib, yer qimirlayapti, deb o‘yladim”

Bang‘illagan ovoz eshitildi, o‘rnimdan turib, uyning siltanishini ko‘rib, yer qimirlayapti, deb o‘yladim. Olov cho‘g‘i uygacha otilardi. Shisha siniqlari uyga kirdi. Xayriyat, hech kimga tegmadi. Judayam qo‘rqib ketdim, bolalarimni olib, ko‘chaga yugurib chiqdim, — deydi voqeaga guvoh bo‘lgan yana bir suhbatdosh Zamira Umarova.

Toshkent shahar Sergeli tumani “Quruvchi” MFY Xonobod ko‘chasida joylashgan Inter Logistics MCHJga qarashli omborxonalar hududida chaqnash oqibatida yong‘in sodir bo‘lgani to‘g‘risida xabar FVBga 28-sentyabr kuni soat 02:43 da kelib tushgan. Shunga ko‘ra, yong‘in-qutqaruv bo‘linmalari soat 02:48 da yong‘inga yetib borib, tezkor harakatlar natijasida, soat 05:02 da yong‘in qurshab olingan va soat 10:47 da batamom o‘chirilgan.

Qayd etilishicha, yong‘inni bartaraf etish ishlariga FVV va boshqa tegishli tashkilotlardan jami 210 ta texnika va 2000 dan ortiq shaxsiy tarkib jalb qilindi. Dastlabki o‘rganish ishlariga ko‘ra, 15 ming kvadrat metr omborxona maydonida yong‘in o‘chirilib, 30 ming kvadrat metr maydoni saqlab qolindi.
Vaziyat to‘liq nazoratga olinib, hozirda uning oqibatlarini bartaraf etish ishlari amalga oshirilmoqda.
Sodir bo‘lgan yong‘in yuzasidan dastlabki tergovga qadar surishtiruv ishlari va moddiy zarar miqdorini aniqlash ishlari Toshkent shahar prokuraturasi, Ichki ishlar bosh boshqarmasi va Favqulodda vaziyatlar boshqarmasi tomonidan hamkorlikda olib borilmoqda.

Hodisa oqibatida jabrlanganlarning umumiy soni 163 kishini tashkil etdi, bir nafar o‘smir hodisa oqibatida vafot etdi. Mazkur holat yuzasidan IIV Tergov departamenti tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a” va ”b” bandlari bilan jinoyat ishi qo‘zg‘atildi. Sodir bo‘lgan favqulodda hodisani o‘rganish, ko‘rilgan talafotlarni bartaraf etish va jabrlanganlarga yordam ko‘rsatish bo‘yicha prezident topshirig‘iga ko‘ra hukumat komissiyasi tuzildi.