O‘zbekiston joriy yilning 1-oktyabridan Rossiyadan gaz import qilishga tayyor. Bu haqda “Daryo”ga Energetika vazirligi matbuot kotibi Hasan Toshxo‘jayev maʼlum qildi.
Foto: “Daryo”
Hasan Toshxo‘jayevga ko‘ra, O‘zbekiston infrastrukturasi Rossiya gazini qabul qilib olishga tayyor.
“Import jarayoni juda murakkab. U faqat O‘zbekistonga bog‘liq emas. O‘rtada tranzit davlat ham bor. Men faqat o‘z tarafimizdan gapirib, O‘zbekiston infrastrukturasi Rossiya gazini qabul qilib olishga 100 foiz tayyorligini ayta olaman, xolos. Lekin ayni sanadan gazni qabul qilamizmi yoki yo‘q, bu borada aniq maʼlumotga ega emasman. Ayta oladiganim — biz Rossiya gazini qabul qilishga tizimni tayyorlaganmiz va quvurlarimiz yuqori bosimli gazni qabul qilib olishga tayyor”, —deya maʼlum qildi vazirlik matbuot kotibi.
Joriy yil 16-iyunda tuzilgan shartnomaga muvofiq, 1-oktyabrdan Rossiya O‘zbekistonga gaz eksport qilishni boshlaydi. Gaz oldi-sotdisi bo‘yicha shartnoma “UzGaztrade” AJ va “Gazprom eksport” MCHJ o‘rtasida 2 yil muddatga tuzilgan.
“Shartnoma to‘liq tijoriy shartlarda ishlab chiqilib, respublikamiz isteʼmolchilarining tabiiy gazga bo‘lgan yildan yilga oshib borayotgan ehtiyojini qisman qondirish hamda kuz-qish mavsumini betalafot o‘tkazishga qaratilgan chora-tadbirlardan biridir. Shartnoma doirasida joriy yilning 1-oktyabridan kuniga 9 million kubometr tabiiy gazni import qilish boshlanishi mo‘ljallanmoqda. Yillik hajm esa qariyb 2 milliard 800 million kubometrni tashkil etadi”, — deya xabar bergan O‘zbekiston Energetika vazirligi.
Avvalroq “Daryo” muxbirining mazkur so‘roviga javoban, Energektika vazirligi “Rossiyadan sotib olinayotgan gaz qish faslida O‘zbekiston ehtiyojining yetishmayotgan qismini qoplaydi”, — deya javob qaytargan. Ammo Rossiya gazi necha puldan sotib olinayotgani haligacha ochiqlanmagan. Energetika vaziri Jo‘rabek Mirzamahmudov O‘zbekiston Rossiyaga gaz uchun qancha to‘lashini ochiqlay olmasligi, lekin narxni belgilashda milliy manfaatlardan kelib chiqilganini aytgan.
Izoh (0)