Indoneziya sudi 33 yoshli bloger Lina Lutfiavatini cho‘chqa go‘shti yegani aks etgan TikTok videosi uchun ikki yillik qamoqqa hukm qildi va unga 16 ming dollardan ortiq jarima soldi, deb yozmoqda New York Times.
Mart oyida Lutfiavati o‘zining TikTok kanaliga joylagan videoda uning Balida cho‘chqa go‘shti qo‘shilgan taom yeyayotgani ko‘rsatilgan. Ovqatlanishni boshlashdan oldin bloger “Bismillah” deb aytgan.
Ikki millionga yaqin obunachiga ega Lutfiavati videosi aholisining aksariyatini musulmonlar tashkil etadigan Indoneziyada janjalga sabab bo‘ldi. Musulmon diniy arboblaridan biri Lutfiavatini kufrda ayblab, uning ustidan politsiyaga shikoyat qildi.
Sentabr oyida Sumatra orolidagi Palembang shahri sudi blogerning ishini o‘rganib chiqdi hamda uni qamoq va jarimaga hukm qildi. Lutfiavatini ayblagan din arbobining advokati sud qaroriga izoh berdi.
“Qaror ushbu fuqaro uchun davlatni himoya qilish, shov-shuv ko‘tarmaslik va har bir diniy jamoani hurmat qilish borasida dars bo‘ldi”, — dedi u.
Lutfiavatining o‘zi video uchun bir necha bor uzr so‘raganini aytdi.
“Qilgan ishim noto‘g‘ri ekanini bilaman, lekin ikki yillik qamoq jazosini kutmagandim”, — dedi u.
Indoneziya — dunyodagi eng ko‘p musulmon aholiga ega davlat. Unda 275 millionga yaqin odam istiqomat qiladi, ularning deyarli 90 foizi islom diniga eʼtiqod qiladi. 2000-yillarning boshidan beri, New York Times ma’lumotlariga ko‘ra, Indoneziyada kufr holatlari tobora ko‘payib bormoqda, ularning ba’zilariga sud tomonidan qamoq jazosi tayinlangan.
Izoh (0)