Toshkent moliya instituti o‘qituvchilar va talabalar o‘rtasida sog‘lom turmush tarzini targ‘ib qilish maqsadida turli sport to‘garaklari va musoboqalarini tashkil etib kelmoqda. Bu gal ham institut miqyosida doimgidanda kattaroq va qiziqarliroq bo‘lgan sport musoboqasi — “Talabalar ligasi”ga start berildi. Musoboqa avvalida institut sport majmuasida tantanali tadbir o‘tkazildi. Unda oliygoh rahbariyati, sport ustalari, taniqli sanʼatkorlar va talaba–yoshlar jam bo‘ldi. Mehmonlar ishtirokchilarga omad va zafarlar tiladi.
“Talabalar ligasi” musoboqalari institutimizda ilk bor sportning futbol, basketbol, voleybol, stol tennisi, shaxmat turlari bo‘yicha uyushtirildi. Hozirda bizning oliygohda 15 ming nafarga yaqin talabalar tahsil olmoqda. Barcha yoshlarimizni ushbu musoboqaga jalb etganmiz. O‘ylaymanki, bu bellashuvlar talabalarning sportga bo‘lgan qiziqishini ancha kuchaytiradi. Barchalariga omad tilaymiz”,—dedi institut rektorining birinchi o‘rinbosari Komila Karimova.
Tantanali tadbirda mehmon bo‘lgan bokschi, olimpiada chempioni Fazliddin G‘oyibnazarov musoboqa to‘g‘risida o‘z fikrlarini bildirdi.
“Bugungi ochilish marosimi juda ham chiroyli o‘tdi. Toshkent moliya instituti sifatli taʼlim berish bilan birga sport bo‘yicha ham faol hisoblanadi. Oliygohda ko‘plab musoboqalarda chempionlikni qo‘lga kiritgan talabalar tahsil oladi. Bugun tashkil etilgan musoboqa ham yoshlar uchun juda foydali bo‘ladi deb o‘ylayman. Talabalar o‘zlari uchun yaratilgan bu kabi imkoniyatlardan unumli foydalanishlariga ishonamiz”, —dedi sportchi.
Toshkent moliya institutida sportning o‘nlab turlari bilan shug‘ullanish uchun shart–sharoitlar yaratilgan. Yaqinda institut sport majmuasining trenajyor zali uchun yangi jihozlar olib kelindi. Majmuada ko‘plab talabalar darsdan bo‘sh vaqtlarida sport bilan muntazam shug‘ullanadi.
Ular xalqaro va respublika miqyosidagi musoboqalarda ham faol ishtirok etib kelmoqda. Masalan, 2022-2023 o‘quv yili davomida 100 nafardan ortiq yoshlar tuman, shahar, respublika va xalqaro sport musobaqalarida yuqori natijalarni qayd etgan. Ulardan uch nafari ustasi unvonini qo‘lga kiritdi.
Umuman olganda, Toshkent moliya institutida talabalarga nafaqat zamonaviy bilim va ko‘nikma berish, balki ularning salomatligini taʼminlash uchun ham yetarli imkoniyatlar mujassam. Beshta sport turi bo‘yicha tashkil etilgan “Talabalar ligasi” sport musobaqalari ham ana shunday imkoniyatlardan biridir.
Reklama huquqi asosida.
Izoh (0)