Latviya Seymi liberal-konservativ “Yangi birlik” partiyasidan bosh vazir Evika Silinya boshchiligidagi respublikaning yangi hukumatini tasdiqladi. 48 yoshli huquqshunos rahbarlik qiladigan Vazirlar Mahkamasini 100 deputatdan 53 nafari qo‘llab-quvvatlagan, 39 nafar deputat esa qarshi ovoz bergan. Hukumatning yangi koalitsiyasiga “Yangi birlik”dan tashqari “Yashillar va dehqonlar ittifoqi” hamda so‘l-markazchi “Progressiv” partiyasi ham kirdi.
Parlamentda so‘zga chiqqan Evika Silinya, xususan, Latviyaning mudofaa budjetini oshirish va Ukrainani qo‘llab-quvvatlashda davom etishni va’da qildi.
“Mudofaa budjetini oshiramiz hamda Qurolli kuchlarimizni kuchaytiramiz. Biz Ukrainani qo‘llab-quvvatlaymiz”, — dedi u.
Ilgari Silinya Latviya farovonlik vaziri lavozimida ishlagan. Bosh vazir sifatida u avgust oyi o‘rtalarida hukumat tarqab ketganidan keyin iste’foga chiqishini e’lon qilgan partiyadoshi Krishyanis Karinshning o‘rnini egalladi. O‘shanda Karinsh o‘zining koalitsiyadagi hamkorlari — “Qo‘shma ro‘yxat” va “Milliy birlashuv”ni farovonlik va iqtisodiy o‘sishni ta’minlash bo‘yicha ishlarga to‘sqinlik qilishda ayblagandi.
Yangi hukumatda Karinsh tashqi ishlar vaziri lavozimini egallaydi.
Izoh (0)