“Daryo”da Toshkent shahrining Yashnobod tumanida 9 ta xonadondan iborat uch qavatli uy 39 nafar kishiga pullangani bilan bog‘liq firibgarlik holati ochiqlangandi. So‘ngra Bosh prokuratura axborot xizmati holat yuzasidan prokuratura organlari tomonidan tergovga qadar tekshiruv harakatlari o‘tkazilayotganini ma’lum qildi. Qurilish va uy-joy kommunal xo‘jaligi vazirligining “Daryo”ga qo‘shimcha qilishicha, uy-joy xaridorlari aldangan.
Ushbu holat vazirlik mas’ullari tomonidan joyiga chiqib o‘rganildi. Aniqlanishicha, bu joy aslida yakka tartibdagi uy-joy qurishga mo‘ljallangan joy bo‘lib, 10 sotixli hovlida fuqaro Babajonovaga tegishli yakka tartibdagi uy-joylar borligi aniq bo‘ldi. 2018-yilda bu joy oldi-sotdi shartnomasi asosida Kulik Aleksandr tomonidan sotib olingan. Shundan so‘ng 10 sotix maydon va qurilish binolari uchun kadastr hujjati rasmiylashtirilgan. Chala qolgan qurilish ishlarini tugatish uchun tuman qurilish bo‘limiga loyiha-smeta hujjatlarini kelishish bo‘yicha murojaat qilingan. Hujjatlar to‘g‘riligi sabab, obyektga yakka tartibdagi uy-joy qurilishi uchun ijobiy xulosa berilgan, — deydi vazirlikning Bosh rejalarga rioya etilishi ustidan davlat arxitektura nazorati boshqarmasi boshlig‘i Nodir Rejaboyev.
Vazirlik vakilining bildirishicha, haqiqatdan ham Yashnobod tumanining “Go‘zal” mahallasi hududida yakka tartibda qurilishi mo‘ljallangan va shunga ruxsat etilgan joyda qurilishi tugallanmagan binolar bor. Biroq, mazkur hududdan ko‘p qavatli turar-joy binosini qurish uchun na vazirlik va na uning quyi bo‘g‘indagi tashkilotlari tomonidan ruxsatnoma berilgan.
Shaharsozlik kodeksining 54-moddasiga ko‘ra, aholi punktlari hududida obyektlarni bosh rejasiz, boshqa zarur hujjatlarsiz loyihalashtirish hamda qurilish ishlari taqiqlanishi belgilangan. Bundan tashqari Vazirlar Mahkamasining 200-sonli qaroriga asosan, qavatlar sonidan qat’iy nazar yakka tartibdagi turar joylar ichida ko‘p qavatli turar joylar qurilishi taqiqlangan. Shu sababli fuqaro loyihadan so‘ng bir necha marotaba murojaat qilsa-da, ruxsat berilmagan, — deydi mas’ul.
Nodir Rejaboyevning aytishicha, yakka tartibdagi uy-joylar uchun mo‘ljallangan hududlarda ko‘p qavatli turar joylar qurilsa kommunikatsiya tarmog‘i bilan bog‘liq muammolar kelib chiqadi.
Shu sabab hech qachon yakka tartibdagi uy-joylar uchun mo‘ljallangan joydan ko‘p qavatli turar-joylar qurilishiga ruxsat etilmaydi, — deydi mas’ul.
Vazirlik mas’ullarining sodda qilib tushuntirishicha, Zohmir Group nomli qurilish kompaniyasiga ko‘p qavatli turar-joy uchun pul to‘laganlar aldangan.
Vazirlikning qurilish va uy joy kommunal xo‘jaligi boshqarmasi boshlig‘i Elyor Komilov fuqarolarga murojaat qilib, kelajakda aldanib qolmaslik uchun ko‘p kvartirali uydan xonadon xarid qilishda quruvchilar bilan o‘rtada tuzilayotgan shartnomalarni to‘liq o‘qib ko‘rishni, kerakli hollarda huquqshunoslarga mazkur shartnomani ko‘rsatishni, mazkur shartnomalarga o‘z talab va takliflarini ham kiritishlari lozimligini aytmoqda.
Fuqarolarimiz bitmagan uy-joy sotib olayotganda Qurilish va uy-joy kommunal xo‘jaligi vazirligining rasmiy saytidan quruvchi tashkilot haqida ma’lumot olishlari kerakligini eslatib o‘tamiz. Fuqarolar saytdan qurilishi boshlangan uy-joylarning qurilishga ruxsat beruvchi hujjatlari, shuningdek, loyiha va ekspertiza hujjatlari bilan tanishib chiqishi mumkin. Qolaversa, fuqarolar qurilish boshayotgan quruvchining 20 foiz mablag‘ga ega ekanligi, bankdan alohida hisob raqam ochganligini ko‘rib, bilib olishlari mumkin bo‘ladi. Shu sabab quruvchining Qurilish va uy-joy kommunal xo‘jaligi vazirligining elektron platformasidan ro‘yxatdan o‘tganligini ko‘rishlarini tavsiya etamiz, — deydi Elyor Komilov.