Jahon oziq-ovqat tashkiloti ehtiyojmand afg‘onistonliklarga yordamni qisqartiradi

Jahon oziq-ovqat tashkiloti mablag‘ yetishmasligi tufayli Afg‘onistonga yordamini qisqartirmoqda, deb xabar berdi Fars News.

Moliyaviy muammolar sabab Jahon oziq-ovqat dasturi har besh nafar ehtiyojmand afg‘ondan faqat bittasiga yordam ko‘rsata olishini ma’lum qildi.

Tashkilot xabarida Afg‘onistondagi gumanitar falokatning oldini olish uchun 1 milliard dollar mablag‘ kerakligi aytilgan. Qayd etilishicha, tashkilot har oy uch million afg‘onistonlikka yordam ko‘rsatadi.

Yordam uchun mablag‘ yetishmasligi qish arafasida Afg‘oniston aholisining 90 foizdan ortig‘iga ta’sir ko‘rsatishi kutilmoqda, chunki Afg‘oniston ko‘p jihatdan xalqaro yordamga tayanadi.

Ekspertlarning ta’kidlashicha, ochlik afg‘on aholisini pul va oziq-ovqat topishning muqobil yo‘llarini izlashga majbur qiladi, bulardan eng tez va osoni — jinoyat, ya’ni giyohvand moddalar savdosi, talonchilik va terrorizmdir. Ushbu ssenariy ekstremistik kayfiyatning kuchayishi uchun qulay zamin yaratadi, bu esa keyinchalik Afg‘onistonga qo‘shni davlatlar, Xitoydan tortib Markaziy Osiyogacha bo‘lgan mamlakatlarda vaziyatning keskinlashuviga olib keladi.