AQSH Kongressi Vakillar palatasi spikeri, respublikachi Kevin Makkartining ma’lum qilishicha, palata qo‘mitalari AQSH prezidenti Jo Baydenga qarshi impichment jarayonini boshlashga sabab bo‘lishi mumkin bo‘lgan tergovga kirishdi. Bu haqda Associated Press xabar bermoqda.
Makkartining so‘zlariga ko‘ra, Vakillar palatasining so‘nggi oylarda Bayden oilasiga nisbatan olib borgan tekshiruvi “korrupsiya madaniyati”ni aniqlagan, bu esa chuqurroq tekshirishni talab qiladi.
“Bular hokimiyatni suiiste’mol qilish, qonunni qasddan buzish va korrupsiya ayblovlari”, — dedi Makkarti.
Tergovga rahbarlik Sud-huquq qo‘mitasi, Nazorat va mas’uliyat qo‘mitasi hamda “Yo‘llar va chora-tadbirlar” qo‘mitasiga yuklatildi. AP taʼkidlaganidek, bu qo‘mitalar bir necha oy davomida Jo Bayden oilasi bilan bog‘liq turli tekshiruvlar bo‘yicha birga ishlamoqda, biroq hozircha AQSH prezidentining ularga aloqadorligini tasdiqlaganicha yo‘q.
Oq uy Kevin Makkartnining bayonotini “eng yomon holatda ekstremal siyosat” deb atadi.
“Respublikachilar palatasida to‘qqiz oy davomida prezident ustidan tergov olib borildi va ular qonunbuzarlik haqida hech qanday dalil topmadi. Bu haqda Respublikachilar partiyasi a’zolarining o‘zlari ma’lum qilgan”, — dedi Oq uy matbuot kotibi Yen Sems.
Hozirda Vakillar palatasini deyarli to‘liq nazorat qilayotgan respublikachilar Jo Baydenni 2009—2017-yillarda vitse-prezident bo‘lib ishlagan vaqtida o‘g‘li Xanterning xorijdagi bizneslaridan foyda ko‘rganlikda ayblamoqda. Respublikachilar hech qanday dalil keltirmagan. Jo Bayden respublikachilarning bayonotlarini masxara qildi.
Respublikachilar partiyasi vakillari AQSH prezidentining o‘g‘lini turli jinoyatlarda ayblamoqda: giyohvand moddalarni iste’mol qilishdan tortib, korrupsion sxemalarda ishtirok etish va otasining ta’siri ostida savdo qilishgacha. Respublikachilar fikricha, Jo Bayden ma’muriyati prezidentning o‘g‘liga qarshi qo‘yilgan ayblovlarni ko‘rib chiqishda ancha yumshoqlik qilmoqda.
Vakillar palatasi 2019 va 2021-yillarda (o‘sha paytda u demokratlar tomonidan nazorat qilingan) ikki marta AQSHning 45-prezidenti Donald Trampga impichment e’lon qilgan, biroq ikki martada ham uni Senatda oqlashgan.
Izoh (0)