Polsha janubida, Ukraina bilan chegaradosh Jeshov shahrida legionellez (“legionerlar kasalligi”)dan vafot etganlar soni o‘n bir nafarga yetdi, deb xabar bermoqda RMF FM Jeshov davlat sanitariya inspeksiyasiga tayanib.
Kasallik qurbonlari 64 — 95 yosh oralig‘ida bo‘lgan. Hozirgacha shaharning 144 nafar fuqarosida ushbu bakteriya tasdiqlangan.
Polsha Ichki xavfsizlik agentligi legionellez infeksiyasining so‘nggi to‘lqinini “diversantlik natijasi” deb aytishga asos yo‘qligini xabar qildi.
Jeshovda birinchi infeksiya holatlari o‘tgan haftada qayd etilgan. Sog‘liqni saqlash inspektori Marek Posobkevichning so‘zlariga ko‘ra, infeksiyani qo‘zg‘atuvchi Legionella bakteriyasi shahar suv ta’minoti tizimi orqali tarqalgan bo‘lishi mumkin.
“Legionerlar kasalligi” nima?
Legionellez yoki “legionerlar kasalligi” — Legionella turiga mansub har xil mikroorganizmlarni keltirib chiqaradigan o‘tkir yuqumli kasallik. U kuchli isitma, umumiy intoksikatsiya (zaharlanish), o‘pka, markaziy asab tizimi va ovqat hazm qilish organlarining shikastlanishi bilan kechadi. Legionella pneumophila birinchi marta 1977-yilda aniqlangan, u Filadelfiyadagi Amerika legioni syezdi ishtirokchilari orasida tarqalgan o‘tkir pnevmoniya sababchisi deb topilgan.
Jahon sog‘liqni saqlash tashkiloti ma’lumotlariga ko‘ra, infeksiyaning eng keng tarqalgan usuli bu bakteriyali suvdan olingan ifloslangan aerozollardan nafas olish. Aerozol manbalariga konditsioner sovitish moslamalari, issiq va sovuq suv tizimlari, namlagichlar va gidromassaj vannalari kiradi.
Izoh (0)