Ingliz tili o‘qituvchisi 16, informatika o‘qituvchisi esa 14 mln: Qashqadaryoda 1000 dollardan ko‘p maosh olayotgan o‘qituvchilar bor

Qashqadaryo viloyatining Koson tumanida faoliyat yurituvchi ingliz tili hamda informatika fani o‘qituvchilari 1000 dollardan ham ko‘p maosh olmoqda. Bu haqda “Daryo” muxbiri xabar berdi.

Maʼlum bo‘lishicha, har ikki o‘qituvchi ham bir maktabda faoliyat yuritadi.

Ayni kunda 16 million so‘m maosh olayotgan Nargiza Norqulovaning mehnat faoliyatiga 10 yil to‘ldi. U Koson tumanidagi 9-sonli ixtisoslashtirilgan davlat umumtaʼlim maktabida ingliz tili fanidan dars berib keladi.

 

 

Ish faoliyatimning beshinchi yilida oliy toifali o‘qituvchi maqomiga erishdim. Shuningdek, milliy va xalqaro sertifikatlardan aʼlo darajada o‘tib, C1 darajasi sohibasi bo‘ldim. Yuzdan ortiq o‘quvchilarim B2, C1 darajalarini qo‘lga kiritib, oliy taʼlim muassasalarida grant asosida o‘qib kelishmoqda. Bundan tashqari, 10 dan ortiq o‘quvchilarim xorijning nufuzli davlatlaridagi top universitetlarda o‘qiydi, — deydi u.

O‘qituvchining aytishicha, 2023-yilgacha uning oylik maoshi 11 million so‘mni tashkil qilgan.

Hozirgi kunda vazir jamg‘armasi uchun belgilangan imtihonlardan muvaffaqiyatli o‘tganim uchun oylik maoshimga yana 5 million so‘m qo‘shildi. Natijada ayni kunda 16 million so‘m maosh olib kelyapman, — deydi o‘qituvchi.

Koson tumanidagi 9-sonli ixtisoslashtirilgan davlat umumtaʼlim maktabining informatika va axborot texnologiyalari fani o‘qituvchisi Ulug‘bek Mamatqulov ham 1000 dollardan ko‘p maosh oladi.

 

 

25 yillik ish tajribaga ega o‘qituvchi ayni kunda 14 million so‘m maosh olishini aytmoqda.

25 yillik o‘qituvchi bo‘lsam, so‘nggi 6-7 yillik ish faoliyatimizdagi taʼlimga eʼtibor, bizning 14 million so‘mdan maosh olishimizga imkoniyat yaratmoqda. Sir emaski, bundan oldin o‘qituvchilar paxta dalasida ko‘karardi. Bugun hech qanday mubolag‘asiz men o‘qituvchiligimdan chin maʼnoda faxrlanyapman. Hozir to‘y-maʼrakalarda ko‘rib qolishsa ham ustoz, ustoz, deb hurmat ko‘rsatishmoqda, — deydi Ulug‘bek Mamatqulov.

Nargiza Norqulova hamda Ulug‘bek Mamatqulovlar prezident Shavkat Mirziyoyevning o‘qituvchilar maoshini 1000 dollarga yetkazish haqidagi tashabbusini eshitgach, avvaliga ishonqiramaganini, ammo shunday imkoniyat berilsa, shu maoshni oluvchi birinchi o‘qituvchi men bo‘laman, deya niyat qilganini aytmoqda.

O‘qituvchilar maoshi 1000 dollarga yetkazilsa, o‘sha maoshni oluvchi birinchi o‘qituvchi o‘zim bo‘laman, deya harakatga tushdim, — deydi har ikki o‘qituvchi bu haqda gapirar ekan.

Prezident Shavkat Mirziyoyev raisligida 28-avgust kuni bo‘lib o‘tgan maktablarda taʼlim sifatini yanada oshirish, o‘quvchi o‘rnini ko‘paytirish hamda o‘qituvchilar malakasini oshirish va ularga munosib sharoit yaratish bo‘yicha ustuvor vazifalarga bag‘ishlangan videoselektor yig‘ilishida O‘zbekistonda yuqori maosh oluvchi o‘qituvchilar soni ochiqlangandi. Ta’kidlanishicha, mamlakatda 6 million so‘mdan 10 million so‘mgacha maosh oladigan o‘qituvchilar soni — 23 ming nafarga yetgan. 10 million so‘mdan yuqori oylik oluvchilar esa mingdan oshgan. Yana ikki mingga yaqin muallimlarga Vazir jamg‘armasidan qo‘shimcha ustamalar to‘lanmoqda.