“O‘zbekneftgaz” AJga qarashli UNG Petro avtomobillarga yonilg‘i quyish shoxobchalarida Ai-92 benzinining narxi 8600 so‘mdan 9200 so‘mga oshirildi. Kompaniyaning ma’lum qilishicha, narx ko‘tarilishi bahordan beri amal qilib kelgan chegirma yakunlangani bilan bog‘liq.
Joriy yilning mart oyida bahorgi chegirma eʼlon qilinib, UNG Petro AYQSHlaridagi Ai-92 markali benzin narxi 9200 so‘mdan 7 500 so‘mga pasaytirilgandi. “O‘zbekneftgaz”AJ mazkur chegirma faqat cheklangan muddatda amal qilishini bildirgan.
Avgust oyi boshida mazkur markadagi benzin narxi 8 600 so‘mga ko‘tarildi. Bugun (16-avgust kuni) esa UNG Petro zapravkalarida Ai-92 benzinining 1 litri 9200 so‘mdan sotilmoqda.
“Qish oylarida Ai-92 benzinining litri 9200 so‘m bo‘lgan. Bahorgi aksiya doirasida narx 7500 so‘mga tushirilgandi. Hozirda aksiya tugab, narxlar yana joyiga qaytdi”, — deya “Daryo”ga maʼlum qildi kompaniya vakillaridan biri.
Eslatib o‘tamiz, aprel oyida Energetika vazirligi ko‘rilayotgan choralar natijasida Ai-92 markali avtobenzin narxi may oyida 7500 so‘mdan ham arzonlashishi kutilayotganini bildirgandi.
“O‘zbekneftgaz” departament boshlig‘i Jamshid Bagirov “Daryo” muxbiri bilan suhbatda kompaniyaga qarashli AYQSHlar soni respublikadagi jami zapravkalarning 3 foizini tashkil etishini aytgan.
Respublikada 2500 ta atrofida AYQSHlar bo‘lsa, shundan “O‘zbekneftgaz”ga tegishlilari atigi 70 ta, xolos. Bu umumiy hisobda 2-3 foizni tashkil qiladi, — degan kompaniya vakili.
Izoh (0)