Xitoyda bolalar onlayn o‘yinni kamroq o‘ynashi uchun ularga telefondan foydalanishni cheklash rejalashtirilmoqda. Bu haqda Reuters xabar berdi.
Tashabbusga ko‘ra, 18 yoshga to‘lmagan shaxslarga soat 22:00 dan 06:00 gacha mobil internetdan foydalanish taqiqlanadi. Xitoyning Kibermakon ma’muriyati mobil qurilma sotuvchilaridan telefonlarda shunday rejimni sozlashlarini xohlayotganini aytdi.
Smartfonlarning o‘zidan foydalanish vaqti ham cheklangan bo‘ladi, ya’ni 8 yoshgacha bo‘lgan bolalar kuniga 40 daqiqagacha, 16-17 yoshlilar esa 2 soatgacha foydalanishi mumkin. Har yarim soatda qurilma foydalanuvchisiga tanaffus qilish zarurligini eslatishi kerak.
Qoidalar loyihasi Xitoyning onlayn o‘yinlarning bolalar va o‘smirlarga taʼsirini cheklash siyosatining davomi hisoblanadi. Rasmiylar buni 2023-yil sentabrigacha muhokama qiladi.
Izoh (0)