Toshkent—Samarqand avtomobil yo‘lida Nexia-2 rusumli transport vositasi ikkita yuk mashinasi orasida qolib ketdi. Bu haqda “Markaziy studiya” informatsion dasturida ma’lum qilindi.
Qayd etilishicha, 20-iyul kuni soat 18:00 larda Sirdaryo tumanidagi “Dehqonobod” MFYdan o‘tgan M34 avtomobil yo‘lida Nexia-2, “Zil” va Howo yuk mashinalari ishtirokida YTH sodir bo‘lgan. “Zil” svetoforning qizil chirog‘ida to‘xtab turgan vaqtida Spark rusumli mashina egasi boshqaruvni yo‘qotib, yuk mashinasining orqa qismiga kelib urilgan.
Spark ortidan kelayotgan kulrang Nexia-2 ham yengil mashinaga urilgan va Spark’ni yo‘lning qatnov qismidan chiqarib tashlagan. “Zil” ortida to‘xtab qolgan Nexia-2’ning ortidan kelayotgan Howo to‘xtashga ulgurmagan va kulrang transport vositasi ikki yuk mashinasining orasida qolib ketgan.
YTH oqibatida Nexia-2 haydovchisi va yo‘lovchisi voqea joyida vafot etgan, Spark yo‘lovchisi esa Sirdaryo tumani tibbiyot birlashmasiga yotqizilgan.
Ma’lum qilinishicha, 20-iyulning o‘zida respublika bo‘ylab 6 ta YTH yuz bergan. Halokatlar oqibatida uch kishi vafot etgan va yana uch kishi jarohat olgan.
Bundan oldin Toshkentning Uchtepa tumanida uchta mashina ishtirokida yo‘l-transport hodisasi sodir bo‘lgani, Samarqandda yigit tog‘asining mashinasini olib qochib, 4 ta avtomobil bilan to‘qnashgani, O‘zbekiston parlamenti quyi palatasi yonidagi piyodalar o‘tish joyida Damas ayolni urib yuborgani to‘g‘risida xabar berilgandi.
Izoh (0)