Vazirlar Mahkamasining 21-iyuldagi qarori bilan Davlat muassasalari to‘g‘risidagi nizom tasdiqlandi.
Hujjat prezidentning 2022-yil 8-fevraldagi “Davlat muassasalarini isloh qilishni jadallashtirish chora-tadbirlari to‘g‘risida”gi qaroriga muvofiq ishlab chiqilgan.
Nizom, xususan, quyidagilarni belgilaydi:
- davlat muassasasining huquqiy maqomi;
- davlat muassasasining huquqlari, majburiyatlari va javobgarligi;
- davlat muassasasini tashkil etish, qayta tashkil etish va tugatish, filiallari va vakolatxonalarini tashkil etish tartibi;
- davlat muassasasi faoliyatining ochiqligi va oshkoraligini ta’minlash tamoyillari;
- davlat muassasasi faoliyatini nazorat qilish tartibi.
Davlat muassasasi boshqaruv, ijtimoiy-madaniy yoki boshqa notijorat tusdagi vazifalarni amalga oshirish uchun davlat organi yoki tashkiloti tomonidan tashkil etilgan hamda to‘liq yohud qisman u tomonidan moliyalashtiriladigan yuridik shaxsdir.
U vakolatiga kiradigan masalalar hamda unga yuklangan vazifalar va funksiyalarni bajarish bilan bog‘liq bo‘lgan qarorlar, buyruqlar, ko‘rsatmalar qabul qilish, zarur bo‘lganda, boshqa davlat tashkilotlari bilan birgalikda tegishli qarorlar qabul qilish huquqiga ega.
Davlat muassasasi monopoliyaga qarshi organning dastlabki roziligi olingandan so‘ng tashkil etiladi.
Izoh (0)