Rossiya tomonidan anneksiya qilingan Qrim futbol klublari Rossiya Ikkinchi ligasidagi ishtirokini boshladi. Ukraina futbol assotsiatsiyasi (UFA) UEFA va FIFAni Rossiya futbol ittifoqiga (RFI) nisbatan chora ko‘rishga chaqirdi.
Rossiyada 16-iyul kuni Ikkinchi liganing 1-tur bahslari start oldi. Unda Qrimning “Rubin Yalta” va “Sevastopol” klublari o‘yinlarda maydonga tushdi. Shu tariqa Qrim klublari 2014/15-yilgi mavsumdan keyin ilk bor Rossiya chempionatlarida ishtirok etdi.
RFI 2014/15-yilgi mavsumda Qrimning uchta klubiga mamlakat birinchiliklari va kubok o‘yinlarida ishtirok etishga ruxsat bergandi. 2014-yilning 4-dekabrida UEFA Ijroqo‘m yig‘ilishida 2015-yil 1-yanvaridan boshlab Qrim klublarining Rossiya chempionatlarida ishtirok etishini taqiqlash borasida qaror chiqargan. 23-yanvar kuni esa RFI Qrim klublarini musobaqalardan chetlatishga majbur bo‘lgandi.
Biz Rossiya futbol ittifoqi Ukraina klublarini Rossiya musobaqalariga qo‘shishga harakat qilayotgani borasida bir necha bor FIFA va UEFAga murojaat yo‘lladik. Bu masala borasida yana sizlarga yuzlanamiz va mavjud qoidalarni buzayotgan Rossiyaning bu harakatiga chora ko‘rishingizni so‘raymiz.
UFAning ko‘plab shikoyatlariga qaramay 16.07.2023 sanada “Sevastopol” va “Rubin Yalta” jamoalari Rossiya Ikkinchi divizionidagi birinchi o‘yinini o‘tkazdi.
Biz bu harakatni FIFA va UEFA nizomi hamda UEFAning Qrim futboli borasidagi maxsus qoidalarining qo‘pol tarzda buzilishi deb baholaymiz.
UFA yana FIFA va UEFAga murojjat qiladi va RFIning FIFA hamda UEFA a’zoligidan chiqarib yuborish imkoniyatini ko‘rib chiqishni so‘raydi, — deyiladi murojaatda.
UEFA iyun oyi oxirida Qrim klublariga ogohlantirish bergan va jamoalarga RFI musobaqalarida ishtirok etish taqiqlanishini eslatib o‘tgandi.
FIFA va UEFA Rossiyani a’zolikdan chiqarib tashlagan taqdirda terma jamoa o‘rtoqlik o‘yinlari o‘tkaza olmaydi, rus klublari esa xalqaro transfer tizimidan chiqarib yuboriladi va klublardagi barcha futbolchilar shartnomani bir tomonlama bekor qilish huquqiga ega bo‘ladi. Shuningdek, Rossiya FIFA hamda UEFA tomonidan futbol rivoji uchun ajratiladigan yordam pullaridan quruq qoladi.
Izoh (0)