Ispaniyalik 20 yoshli tennischi Karlos Alkaras Uimbldon finalida afsonaviy Novak Jokovichni mag‘lub etdi. Quyida ispaniyalik tennischining faoliyatiga oid ayrim ma’lumotlar taqdim etiladi.
Bo‘lajak yulduz 2003-yilning 5-may kuni Mursiyadagi El-Palmar shaharchasida tug‘ilgan. Karlos tennisga befarq bo‘lmagan oilada o‘sgan. Uning bobosi tennis klubining dastlabki a’zolaridan biri bo‘lgan, otasi esa yarim professional tennischi bo‘lgan va tennis akademiyasini boshqargan.
Karlos ATP musobaqalaridagi faoliyatini 2020-yilning fevralida, 16 yoshida boshladi. Uning uchun debyut turnir Rio Open bo‘ldi. Dastlabki sovriniga esa 2021-yildayoq ega chiqdi va o‘sha yili reytingda 35-o‘ringa qadar ko‘tarildi.
Alkarasning ustozi Xuan-Karlos Ferrero hisoblanadi — sobiq birinchi raqamli raketkachi. Ferrero Rolan Garrosda g‘olib chiqqan yili uning shogirdi dunyoga kelgandi. Ispaniyaliklar tandemi 2018-yilning yozidan beri birgalikda faoliyat yuritadi.
Tabiiyki, Alkaras o‘zi uchun ideal sifatida Rafael Nadalni tanlagan. “Grunt qiroli” o‘zining dastlabki “Ulkan toj”ini 2005-yilda, Karlos bor-yo‘g‘i 2 yosh bo‘lgan vaqtda qo‘lga kiritgan. Bu voqeadan bir yil o‘tib uch yoshli ispaniyalik ilk bor qo‘liga tennis raketkasini oladi.
Nadal bilan tenglashish oson emas. U mening kumirim, bunaqasi faqat bitta. Professional tennischi bo‘lib yetishish uchun tinmay ishlayman, — degandi 16 yoshli Alkaras.
2022-yilda Alkaras faoliyatida birinchi marta o‘z kumirini yengishga muvaffaq bo‘ldi. Bu hodisa Madriddagi Masters turnirida yuz berdi.
“Mening yurtim yana bir aql bovar qilmas o‘yinchiga ega bo‘lganidan haqiqatda juda xursandman. Ispaniya unga uzoq yillar davomida suyanishi mumkin”, — degandi Nadal o‘yindan keyin.
Alkaras ilk “Ulkan toj”iga 2022-yilda ega chiqdi. 19 yoshli ispan US Open finalida Kasper Ruudni mag‘lub etadi (6:4, 2:6, 7:6, 6:3).
O‘sha yili 19 yosh-u 4 oylik Alkaras tarixdagi eng yosh birinchi raqamli tennischiga aylandi. 2022-yil davomida 70 ta o‘yinning 57 tasini g‘alaba bilan yakunladi va beshta musobaqada g‘olib chiqdi.
Alkaras professional faoliyati davomida chimli maydonda bor-yo‘g‘i 18 ta uchrashuv o‘tkazgan. Joriy yilda u chimli maydonlarda mag‘lubiyatsiz odimlamoqda va ikkita musobaqani (Queen’s Club va Uimbldon) yutishga ulgurdi.
Karlosga yutqazib qo‘ygan Jokovich Uimbldonda 2017-yildan beri ilk bor mag‘lub bo‘ldi. Markaziy kortda esa serbiyalik tennischi 10 yil deganda birinchi marta yutqazdi.
20 yoshli tennischi Uimbldondagi g‘alaba orqali 3 million dollar ishlab oldi. Karlosning tennis orqali topgan daromadi umumiy hisobda 19,6 millionga yetdi.
Izoh (0)