Brand Finance konsalting kompaniyasining yillik hisobotiga ko‘ra, Amazon kompaniyasi o‘tgan yil davomida qiymati 14,6 foizga tushib, 299,3 milliard dollarga baholanishiga qaramay, eng qimmat texnologiya brendlari reytingida yetakchilik qilmoqda.
O‘tgan yilgi reytingda birinchi pog‘onani egallagan Apple brendi ikkinchi o‘ringa tushib ketdi. Yil davomida uning qiymati 16,2 foizga tushib, 297,5 milliard dollarni tashkil qildi.
Uchinchi o‘rinni Google brendi (281,4 milliard dollar) egallagan.
Xitoyning Huawei kompaniyasi global siyosiy muhitning qiyinchiliklari, yarimo‘tkazgich komponentlar taqchilligi va butun dunyo bo‘ylab smartfonlarga bo‘lgan talabning pasayishiga qaramay, eng qimmat texnologiya brendlari o‘nligida qolishga muvaffaq bo‘ldi.
Muammolar Huawei iste’molchi qurilmalari biznesiga eng ko‘p ta’sir qildi, biroq kompaniyaning boshqa korxonalari, jumladan, korporativ segment va aloqa uskunalari ishlab chiqarish ancha yaxshi natijalarga erishdi.
Huawei brendining qiymati o‘tgan yil davomida 38 foizga kamayib, 44,3 milliard dollarni tashkil qildi.
Bu yil eng tez rivojlanayotgan texnologiya brendi Yaponiyaning NTT DATA IT-kompaniyasi bo‘ldi (55% o‘sish, 8,9 milliard dollar). O‘sish bo‘yicha ikkinchi o‘rinni LinkedIn ijtimoiy tarmog‘i egalladi – brend qiymati 49 foizga oshib, 15,5 milliard dollarga yetdi.
Izoh (0)