Angliyaning shimoli-g‘arbiy qismida g‘oz 2000 kishini elektrsiz qoldirdi

Angliyada ikki mingdan ortiq uy g‘oz tufayli elektrsiz qoldi. Qush kabelga urilgan, natijada elektr ta’minotida uzilish ro‘y bergan.

Voqea erta tongda sodir bo‘ldi. Natijada Uigan va Bolton shaharlari aholisi toksiz qoldi. Mahalliy energetika kompaniyasi mutaxassislari avariya joyiga yetib borganini va avariyani bartaraf etish ustida ish olib borayotganini ma’lum qildi. Aholi turar joylarining ba’zi qismida elektr ta’minotini qayta tiklash uchun 1 soatcha vaqt kerak bo‘lgan.

“Muhandislar hozir voqea joyida ish olib borishmoqda. Qolgan obyektlarni imkon qadar tezroq elektr quvvati bilan ta’minlash ustida ishlashmoqda”, — dedi kompaniya vakili.

Shunisi e’tiborga loyiqki, shunga o‘xshash voqea bir yil oldin Angliyaning xuddi shu hududida sodir bo‘lgan. G‘oz tufayli Blekrod shahrida (Bolton yaqinida) elektr kabellarida uzilish yuz berib, yong‘in kelib chiqqandi, deb xabar beradi BBC News.