Prezidentlikka nomzod Shavkat Mirziyoyev samarqandlik saylovchilar bilan uchrashuvda kelgusi 7 yilda respublika ahamiyatidagi yo‘llarni qurish va ta’mirlashga jami 5,3 milliard dollar yo‘naltirilishini ma’lum qildi.
“Bugungi kunda, “Toshkent – Samarqand” yo‘nalishida sutkasiga 35 mingta, “Toshkent – Andijon” yo‘lida 30 mingta avtomobil harakat qilmoqda. Bu – yo‘llarga yuklama 1,5-2 barobar ko‘paydi, degani.
Shu bois, Yevropa tiklanish va taraqqiyot banki hamda Jahon banki ko‘magida “Toshkent – Samarqand” va “Toshkent – Andijon” yo‘nalishlarida xususiy sheriklik asosida yangi tezyurar avtomobil yo‘llari quriladi. Bunga 4 milliard dollar investitsiya kiritiladi. Natijada ushbu yo‘nalishlarda manzilga yetib borish vaqti 2 barobar qisqaradi”, — dedi nomzod.
Shavkat Mirziyoyev Osiyo infratuzilma investitsiyalar banki ko‘magida Toshkent – Shahrisabz – Termiz yo‘li qayta qurilishi, “Samarqand – Buxoro – Olot” yo‘li ta’mirlanishini aytdi.
“Bunga 300 million dollar ajratamiz”, – dedi nomzod.
Shavkat Mirziyoyev o’z so’zida Samarqand viloyatida kelgusi 7 yilda qo‘shimcha 110 mingta yangi o‘quvchi o‘rni yaratilishini aytdi.
“Bunda 21 ta yangi maktab va 347 ta maktab uchun qo‘shimcha bino quriladi, 210 ta maktab kapital ta’mirlanadi. Samarqandda 2030-yilga qadar birorta mahallada bog‘cha muammosi qolmaydi.
Buning uchun, 76 ta mahallada ilk bor bog‘cha faoliyati yo‘lga qo‘yiladi, qo‘shimcha 255 ta bog‘cha tashkil qilinadi”, – dedi nomzod.
Izoh (0)