“Manchester Siti”ni qator yetakchi futbolchilar tark etishi mumkin

“Manchester Siti”ni yozda olti nafar futbolchi tark etishi mumkin.

The Athletic xabariga ko‘ra, himoyachi Kayl Uoker yetarli o‘yin amaliyotisiz qolayotganidan norozi. Bundan tashqari Chempionlar Ligasi finalida asosiy tarkibda tushmagani Uokerga yoqmagan. Shu bois Uoker jamoasini almashtirish haqida o‘ylamoqda.

Mavsumning ikkinchi yarmini “Bavariya”da o‘tkazgan Joau Kanselu ham “Manchester Siti”ni tark etishga yaqin.

Markaziy himoyachi Aymerik Lyaport ham katta ehtimol bilan jamoani tark etadi. Ispaniyalik futbolchi ham o‘yin amaliyotidan qoniqmayapti.

Ilkay Gundo‘g‘anning ham klubdagi kelajagi so‘roq ostida qolmoqda. Ilkayning “Manchester Siti” bilan amaldagi shartnomasi oy oxirida tugaydi. Unga “Barselona”, “PSJ” va boshqa jamoalardan qiziqish bor. Bundan tashqari Bernardu Silvaga ham qator klublar taklif bilan chiqqan.

Riyod Mahrez yozda jamoani tark etishi deyarli aniq bo‘ldi. Futbolchiga Saudiya Arabistonidan qiziqish bor, jazoirlikning o‘zi ham klubni tark etishga qarshi emas.

“Manchester Siti” 2022/23-yilgi mavsumda Premyer Liga, Angliya Kubogi va Chempionlar Ligasi bosh sovriniga ega chiqdi.