Zelenskiy G‘alaba kunini 8-mayga ko‘chirish haqidagi qonunni imzoladi

Ukraina prezidenti Vladimir Zelenskiy G‘alaba kunini 9-maydan 8-mayga o‘tkazish to‘g‘risidagi qonunni imzoladi.

U “Xotira va 1939—1945-yillardagi Ikkinchi jahon urushida natsizm ustidan qozonilgan g‘alaba kuni” deb nomlanadi va rasmiy bayramga aylanadi.

9-may kuni esa Ukrainada Yevropa kuni sifatida nishonlanadi. Bu kun dam olish kuni bo‘lmaydi, ish kuni bo‘ladi.

Avvalroq Zelenskiy G‘alaba kunini o‘zgartirish bo‘yicha qonun loyihasini Oliy Radaga taqdim etganini aytib o‘tgandi.

“Biz davlatimizga mafkuraviy qorishmalarsiz, halol tarixni qaytarmoqdamiz. Dunyoning aksariyat xalqlari 8-may kuni natsizm ustidan qozonilgan g‘alabaning buyukligini eslaydilar. 8-may kuni butun dunyo halok bo‘lganlarning xotirasiga hurmat bajo qiladi. Bugun men Ukraina Oliy Radasiga 8-mayni Xotira va 1939—1945-yillardagi Ikkinchi jahon urushida natsizm ustidan qozonilgan g‘alaba kuni sifatida belgilashni taklif qiluvchi qonun loyihasini taqdim etdim”, — degandi Ukraina prezidenti 8-may kunidagi chiqishida.