O‘zbekistonda keskin issiq ob-havo sabab poyezdlar harakati tezligiga cheklovlar joriy etilmoqda. Bu haqda “O‘ztemiryo‘lyo‘lovchi” matbuot xizmati xabar berdi.
“Harorat ko‘tarilishi natijasida yer usti temiryo‘llarining relslari hamda ularning po‘lat qismlarida harorat juda yuqori bo‘ladi. Shu bois, yo‘lovchilar va poyezdlar harakat xavfsizligini ta‘minlash maqsadida, poyezdlar harakat tezligiga cheklovlar o‘rnatiladi”, — deyiladi xabarda.
Qayd etilishicha, harakat tezligiga cheklovlar o‘rnatilgan poyezdlar sovitish tizimining ishlash quvvati pasayishi mumkin.
“O‘ztemiryo‘lyo‘lovchi” AJ o‘z mijozlaridan, anomal issiqlik tufayli yuzaga kelishi mumkin bo‘lgan noqulayliklar uchun uzr so‘raydi.
Bir necha kun oldin “O‘ztemiryo‘lyo‘lovchi” yo‘lovchi vagonlarni yangilash hamda sovitish tizimi bilan jihozlash borasida olib borilayotgan ishlar to‘g‘risida ma’lumot bergandi. Ma’lum qilinishicha, yo‘lovchi vagonlarni sovitish tizimi bilan jihozlash juda katta sarmoya talab qilinadi, sovitish tizimi bilan jihozlash imkoniyati mavjud bo‘lmagan vagonlarni yangisiga bosqichma-bosqich almashtirilmoqda.
“O‘zgidromet” ma’lumotlariga ko‘ra, 11-iyun, yakshanba kuni respublikaning janubiy viloyatlarida havo harorati 40 darajagacha isiydi. Qator hududlarda chang-to‘zonlar kuzatilishi mumkin.
Izoh (0)