Jud Bellinghem “Real” tarixidagi eng qimmat xarid bo‘ldi. U yana eng qimmat angliyalik futbolchiga aylandi

“Borussiya D”dan “Real”ga o‘tgan Jud Bellinghem futbol tarixidagi eng qimmat narxga sotilgan angliyalik futbolchiga aylandi.

Nemis klubi bonuslar bilan hisoblaganda transferdan 115 million funt (134 million yevro) ishlab oladi.

Shu tariqa Bellinghemning transferi Angliya futbolchilari orasida Jek Grilishning (“Aston Villa”dan “Manchester Siti”ga 100 million funt) rekordini yangiladi. Keyingi o‘rinlarda “Manchester Yunayted”ning xaridlari Harri Maguayr (80 mln funt) va Jeydon Sancho (73 mln funt) joy olgan.

Umumiy olganda Bellinghem futbol tarixidagi eng qimmat 5-futbolchi bo‘ldi. Faqat Neymar (222 mln yevro), Kilian Mbappe (180 mln yevro), Usmon Dembele (140 mln yevro) va Filippe Koutinyo (135 mln yevro) undan qimmatga sotilgan.

Jud “Real” tarixidagi eng qimmatga sotib olingan futbolchiga aylandi. “Borussiya D”ning esa Usmon Dembeledan (140 mln yevro) keyingi eng qimmat sotuviga aylandi.

“Real”ning eng qimmat xaridlari:

1. Jud Bellinghem (“Borussiya”dan) — 134 million yevro
2. Eden Azar (“Chelsi”dan) — 115 mln yevro
3. Garet Beyl (“Tottenhem”dan) — 101 mln yevro
4. Krishtianu Ronaldu (“Manchester Yunayted”dan) — 94 mln yevro
5. Orelyen Tchuameni (“Monako”dan) — 80 mln yevro
6. Zinedin Zidan (“Yuventus”dan) — 77,5 mln yevro
7. Xames (“Monako”dan) — 75 mln yevro
8. Kaka (“Milan”dan) — 67 mln yevro
9. Luka Yovich (“Ayntraxt”dan) — 63 mln yevro
10. Luish Figu (“Barselona”dan) — 60 mln yevro.