Qoraqalpog‘istonning Shumanay tumanidagi korxonada yong‘in sodir bo‘ldi. Bu haqda respublika Favqulodda vaziyatlar boshqarmasi maʼlum qildi.
Aytilishicha, yong‘in 6-iyun kuni soat 20:50 lar atrofida tumandagi “Shumanay Ekoteks” MCHJ hududida yuz bergan.
Yong‘inni o‘chirish uchun Shumanay, Qonliko‘l, Xo‘jayli, Taxiatosh, Qo‘ng‘irot tumanlari va Nukus shahri Favqulodda vaziyatlar bo‘limidan jami 10 ta yong‘in-qutqaruv ekipaji hamda Qoraqalpog‘iston Obodonlashtirish boshqarmasining tumanlardagi bo‘linmalaridan 9 ta suv tashish avtomobili qatnashgan.
Yuzaga kelgan yong‘in oqibatida to‘planib turgan “toypaxtalar” zarar ko‘rgan.
Boshqarma masʼullarining aytishicha, yong‘inga texnika xavfsizligiga eʼtiborsizlik sabab bo‘lgan bo‘lishi mumkin.
Hozirda moddiy zarar aniqlanmoqda. Yong‘in oqibatida tan jarohati olgan yoki halok bo‘lganlar yo‘qligi qo‘shimcha qilindi.
Izoh (0)